META ПРЕТСТАВИ РЕВОЛУЦИОНЕРНА НАРАКВИЦА: Контрола на уреди со мисла и гестови

Технолошкиот гигант Meta објави развој на иновативен уред кој ветува целосна трансформација на начинот на кој корисниците комуницираат со дигиталната технологија. Станува збор за паметна нараквица што им овозможува на луѓето да ги контролираат компјутерите, мобилните телефони и другите паметни уреди – без физички контакт.

Нараквицата користи т.н. површинска електромиографија (sEMG) – технологија која ги регистрира електричните сигнали што мускулите на подлактицата ги создаваат кога се обидуваме да направиме движење. Со други зборови, доволно е корисникот само да замисли движење на прстот или гест, а уредот ќе ја прочита таа намера и ќе ја претвори во дигитална команда.

„Ова е најпрецизниот неинвазивен интерфејс човек-компјутер досега,“ изјави Том Рирдон од лабораториите Meta Reality Labs, кој претходно беше дел од тимот што го разви прелистувачот Microsoft Edge.

Во процесот на развој, Meta собрала десетици илјади примери на гестови преку обемно тестирање, што ѝ овозможило на вештачката интелигенција да учи без потреба секој корисник поединечно да го конфигурира уредот. Според податоци објавени во списанието Nature, тестовите покажале дека корисниците можат да “пишуваат” до 20 зборови во минута – само со движење на раката, без тастатура или глушец.

Технологијата е побрза и поефикасна од многу постоечки решенија, како ЕЕГ интерфејсите (кои користат мозочни бранови) и далеку поудобна од инвазивните уреди како што е Neuralink, бидејќи не бара хируршка интервенција.

Една од главните цели на Meta е примена на оваа технологија кај лица со моторни попречености, вклучително и оние со повреди на ‘рбетниот мозок. Во соработка со Универзитетот Карнеги Мелон, компанијата развива адаптирани верзии што би можеле да обезбедат нов начин на интеракција со светот за овие корисници.

Meta веќе работи на интеграција на нараквицата со паметни очила, со што се отвора можност за целосно нова генерација на интерфејси, каде корисникот ќе може да комуницира со виртуелна и проширена реалност само со мисла и движење на рацете.

Првите комерцијални верзии од оваа технологија би можеле да се појават на пазарот во следните неколку години, со што би се поставиле темелите за нова ера во човечко-компјутерската интеракција.

Со оваа нараквица, границите помеѓу мислата и акцијата сè повеќе се бришат – иднината на дигиталната комуникација е поблиску од кога било.