КОГА-ТОГАШ ЌЕ ОДГОВАРААТ Мицкоски тврди дека Михаилова нелегално е пренесена во Бугарија

Премиерот Христијан Мицкоски денеска за првпат јавно го коментираше случајот со Ива Михаилова, која замина во Бугарија по сообраќајната несреќа со смртни последици за која е обвинета. Тој тврди дека таа била нелегално пренесена преку границата, најави дека Министерството за внатрешни работи истражува како ја напуштила државата и порача дека и таа и нејзиниот татко ќе мора да се соочат со македонските институции.

Мицкоски категорично ги отфрли информациите објавени во бугарските медиуми дека Михаилова и нејзиниот адвокат ја преминале границата на официјален граничен премин и таму биле пречекани од бугарските власти.

„Апсолутно е невистина тоа што го емитуваа бугарските медиуми, односно го пласираа во јавноста, дека заедно со нејзиниот адвокат поминале на регуларен граничен премин и дека таму биле поздравени, дека им се салутирало и така натаму. Тоа претставува лага“, изјави премиерот.

Според него, последниот евидентиран влез на адвокатот на Михаилова во Македонија бил на 28 септември, информација за која, како што рече, потврда имало и од бугарската страна.

„Можам да потврдам дека на нелегален начин е пренесена во Бугарија. Министерството за внатрешни работи истражува и ќе дојдеме до сознание на кој начин е однесена“, рече Мицкоски.

Премиерот го критикуваше политичкото раководство на Бугарија, обвинувајќи го дека случајот го користи за демонстрирање политичка моќ, без да ја согледа штетата што таквиот пристап може да ја предизвика на меѓународен план.

„Жалам што политичкото водство во Бугарија се обидува на овој начин да покаже политички мускули, а не ја сфаќа штетата што самото си ја прави на меѓународен план. Тоа е нивна одлука. Тие избрале ваква политика“, изјави Мицкоски.

Тој изрази жалење и поради начинот на кој Михаилова се претставува во Бугарија, посочувајќи дека најголемиот дел од животот и образованието ги поминала во Македонија.

Одговарајќи на прашање дали Бугарија може да ја екстрадира Михаилова, со оглед на уставната заштита на бугарските државјани, Мицкоски не даде конкретна процена за правната изводливост на таквата постапка. Наместо тоа, повтори дека македонските власти бараат нејзино враќање.

Мицкоски ги отфрли и тврдењата дека заминувањето на Михаилова во Бугарија било однапред договорено, повикувајќи ја бугарската страна да ја врати неа, заедно со нејзиниот татко.

„Ако е тоа така договорено, ние ги бараме назад и неа и нејзиниот родител. Уште денеска нека ги донесат и да видиме дали е така договорено или не“, рече премиерот.

Тој воедно ја обвини македонската опозиција дека за случајот има ставови идентични со оние на бугарското политичко раководство. Според него, целта е да се создаде политичка тема што би влијаела врз рејтингот на владејачката коалиција и би ѝ донела корист на опозицијата.

„Намерата е да се создаде политичка тема за која претпоставиле дека ќе влијае на рејтингот на владејачката коалиција, односно на ВМРО-ДПМНЕ, и на тој начин ќе обезбедат одредена корист за опозицијата“, изјави Мицкоски.

Најдиректната порака ја упати кон Михаилова и нејзиниот татко, најавувајќи дека, според него, двајцата порано или подоцна ќе мора да одговараат пред македонските институции.

„Ве гледам во очи и ви кажувам: кога-тогаш. И татко ѝ и таа ќе одговараат. Кога-тогаш“, порача премиерот.

Ива Михаилова е обвинета во случај на сообраќајна несреќа со смртни последици, а нејзината вина треба да се утврди во судска постапка. Мицкоски во изјавата не прецизираше на која конкретна правосилна пресуда се повикува кога најави дека Михаилова и нејзиниот татко ќе одговараат.