КОНФЕРЕНЦИЈА ВО ОН ЗА МОДЕЛОТ„ДВЕ ДРЖАВИ“ Палестина добива поддршка, САД и Израел се оддалечуваат

Во Генералното собрание на Обединетите нации во понеделник започна конференција посветена на утврдување на параметрите за формирање на палестинска држава и обезбедување на безбедноста на Израел. На настанот присуствуваат десетици министри од целиот свет, додека Соединетите Американски Држави и Израел го бојкотираат.

Генералниот секретар на ОН, Антонио Гутереш, во воведното обраќање нагласи дека конференцијата не смее да се претвори во уште една вежба во добронамерна реторика.

„Ова мора да биде пресвртна точка – момент што ќе поттикне неповратен напредок кон крај на окупацијата и реализација на одржливо решение за две држави,“ истакна Гутереш.

Саудискиот министер за надворешни работи, Фајсал бин Фархан Ал Сауд, ги повика земјите да дадат поддршка за создавање независна палестинска држава. Сличен став изрази и францускиот министер Жан-Ноел Баро, кој рече дека само политичко решение со две држави може да обезбеди мир и безбедност за двете страни.

Палестинскиот премиер, Мохамад Мустафа, ги повика сите членки на ОН веднаш да ја признаат Палестина. Словенечката министерка Тања Фајон додаде дека „нема друго решение за траен мир на Блискиот Исток освен реализација на концептот на две држави“.

Во меѓувреме, портпаролот на Стејт департментот изјави дека САД нема да учествуваат, нарекувајќи ја конференцијата „почит кон Хамас“, кој, според Вашингтон, одбива предлози за прекин на огнот прифатени од Израел. Израелскиот амбасадор Дани Данон ја отфрли конференцијата како „продлабочување на илузии, а не придонес за решение“.

ОН долго време заговара формирање две држави што ќе живеат една покрај друга во безбедни и меѓународно признати граници. Денес, Палестина е признаена од најмалку 141 земја-членка на ОН.

Конференцијата, која трае до среда, предвидува три тркалезни маси и една пленарна сесија. Покрај признавањето на Палестина, темите вклучуваат реформирање на Палестинската самоуправа, разоружување и исклучување на Хамас од политичкиот живот, како и нормализирање на односите меѓу арапските држави и Израел.

Палестинците бараат држава на териториите Западен Брег, Источен Ерусалим и Појасот Газа – области кои Израел ги окупираше во Шестдневната војна во 1967 година.

Во мај минатата година, Генералното собрание на ОН со големо мнозинство ја поддржа кандидатурата на Палестина за полноправно членство, препорачувајќи му на Советот за безбедност позитивно да го разгледа ова прашање.