КЛОП ЖЕСТОКО ГО НАПАДНА ИНФАНТИНО Дури и по Блатер работите станаа полоши
Германскиот стратег смета дека претседателот на ФИФА треба да си замине и дека светскиот фудбал заслужува поинакво раководство.

Јирген Клоп упати остри критики кон претседателот на ФИФА, Џани Инфантино, оценувајќи дека светската фудбалска организација се наоѓа во уште полоша состојба отколку во времето на неговиот претходник Сеп Блатер. Германскиот стратег смета дека е време за промена на чело на ФИФА и дека постојат луѓе кои би можеле да ја водат организацијата во интерес на фудбалот, а не заради сопствени финансиски интереси.
Клоп своите ставови ги изнесе на прес-конференција пред натпреварот меѓу Германија и Холандија во Лигата на нации, при што не ја криеше разочараноста од актуелното раководство на светската куќа на фудбалот.
„Мислењето е едногласно – промената би имала смисла. Не мислев дека работите можат да се влошат по Сеп Блатер, но некој успеа да го направи токму тоа“, изјави Клоп.
Блатер ја напушти претседателската функција во 2015 година, по големиот корупциски скандал што ја потресе ФИФА. Подоцна се соочи со кривична постапка во Швајцарија поради исплата на два милиони швајцарски франци на поранешниот претседател на УЕФА, Мишел Платини. Во тој случај, двајцата на крајот беа ослободени. Инфантино беше избран за негов наследник во 2016 година, но и неговото раководење во последниот период е проследено со критики.
Меѓу најконтроверзните прашања е неговиот обид да привлече приватни инвеститори во нова комерцијална компанија која би управувала со правата поврзани со натпреварувањата на ФИФА, вклучително и Светското првенство. Нови претседателски избори во ФИФА се очекуваат во март 2027 година, а Инфантино веќе ја најави намерата да остане на функцијата.
Клоп смета дека заминувањето на Инфантино би можело да отвори можност за вистински промени во начинот на кој се управува со светскиот фудбал.
„Во моментов, сметаме дека ако Инфантино си замине, неговиот наследник можеби ќе може подобро да ја заврши работата. Верувам дека е можно да се подобрат работите. Секако има луѓе кои се грижат за иднината на фудбалот и кои немаат финансиски интереси поврзани со него. Доколку се здружат и еден од нив стане претседател, тоа би било корисно“, порача германскиот стручњак.
Со ова Клоп директно ја доведе во прашање работата на актуелното раководство на ФИФА, испраќајќи порака дека светскиот фудбал има потреба од промена и луѓе на кои приоритет ќе им биде спортот, а не комерцијалните интереси.

