МИЦКОСКИ МУ ВРАТИ НА ФИЛИПЧЕ СО ДОКУМЕНТ ОД 2023 ГОДИНА Владата на Ковачевски ја внела Алта банка во деловни односи со државата

Премиерот Христијан Мицкоски со документ од времето на владата на СДСМ и ДУИ му возврати на лидерот на СДСМ, Венко Филипче, во врска со случајот „Алта банка“. На денешната надзорна расправа во Собранието, Мицкоски презентираше владина одлука од октомври 2023 година, со која кабинетот на тогашниот премиер Димитар Ковачевски дал согласност Државното правобранителство да воспостави деловни односи со Алта банка Србија.

Според Мицкоски, оваа одлука покажува дека токму владата на СДСМ и ДУИ, многу пред влезот на Алта банка на македонскиот банкарски пазар, воспоставила институционални деловни односи со финансиската институција чиј сопственик е Давор Мацура.

Премиерот пред пратениците го покажа извадокот од Нацрт-записникот од 194. седница на Владата, одржана на 24 октомври 2023 година, а се повика и на одлуката објавена во „Службен весник“ број 123 од 2023 година.

„Јас би сакал еден документ да го презентирам овде пред македонската јавност, а тоа е извадок од Нацрт-записникот од 194. седница на Владата, одржана на 24 октомври 2023 година. Тогаш претседател на Владата е господинот Димитар Ковачевски и на самата седница се отвора темата за Алта банка АД Белград, односно тогашниот министер за финансии Фатмир Бесими излегува со информација во која бара од Владата да му одобри на Државното правобранителство да влезе во деловни односи со Алта банка – Србија“, изјави Мицкоски.

Премиерот оцени дека оваа одлука ја доведува во прашање тезата на СДСМ дека актуелната власт е одговорна за влезот на Алта банка и нејзиниот капитал во Македонија. Тој посочи дека на седницата присуствувале тогашниот премиер Димитар Ковачевски, министерот за внатрешни работи Оливер Спасовски, министерот за земјоделство Љупчо Николовски, министерот за транспорт Благој Бочварски и други членови на владата, од кои дел денес се пратеници на СДСМ.

„Уште во 2023 година Владата на СДСМ и ДУИ на владина седница му дава насока на Државното правобранителство да влезе во деловни односи со Алта банка, со истиот овој сопственик Давор Мацура. Тука се поставува прашањето дали тие тогаш знаеле кој е Давор Мацура или кога се одлучиле акциите што ги поседува државата во банката, која ја купува Давор Мацура, да му ги продадат, имале претстава дека станува збор за руски капитал, „прљави“ пари, криминално стекнати пари или тогаш тоа не важело?“, праша Мицкоски.

Тој нагласи дека членовите на тогашната влада гласале за одлуката со која се овозможило отуѓување на државните акции во банката што ја преземала Алта банка.

Мицкоски упати и директна контратеза на обвинувањата на Филипче за наводно сомнителниот капитал на Алта банка. Според него, доколку постоеле сомнежи за потеклото на капиталот и работењето на Давор Мацура, тогаш тие прашања требало да бидат отворени уште во 2023 година, кога претходната влада донела одлука за воспоставување деловни односи со банката.

„Тоа е мојата контратеза на вашата контратеза дека ние сме дозволиле, а во суштина вие многу порано сте знаеле и сте ја довеле државата во деловни односи со ова лице и со неговиот капитал“, рече премиерот.

Тој додаде дека сака македонската јавност да знае дека првите институционални деловни односи на државата со Алта банка биле воспоставени во времето на владата на СДСМ и ДУИ, на предлог на тогашниот министер за финансии Фатмир Бесими.

Документот што го презентираше Мицкоски беше неговиот одговор на обвинувањата на Филипче, кој претходно побара премиерот да објасни каква била неговата улога во влезот на Алта банка во Македонија и какви инструкции му дал на гувернерот на Народната банка, Трајко Славески. Така, надзорната расправа за состојбите во Алта банка прерасна и во директна политичка пресметка меѓу СДСМ и ВМРО-ДПМНЕ, при што двете страни ја префрлаат одговорноста за деловните и институционалните врски со српската банка врз политичкиот противник.

Клучното прашање што останува е дали одлуката од 2023 година и постапките на претходната влада ги објаснуваат сите околности под кои Алта банка влегла во Македонија, или одговорноста за подоцнежните одлуки и надзорни пропусти треба да се утврдува одделно.