РКЕ ГИ ОБЈАВИ НОВИТЕ ЦЕНИ Дизелот достигнува 100 денари, бензините исто поскапуваат
РКЕ ги објави новите максимални цени на горивата. Бензините поскапуваат за два денара, дизелот за еден денар, а литар ЕУРОДИЗЕЛ ќе чини 100 денари.
Од полноќ, на 3 ноември, стапија во сила новите, повисоки цени на горивата во Македонија, соопшти Регулаторната комисија за енергетика (РКЕ). Според новата одлука, бензините поскапуваат за два денара за литар, додека дизелот ќе има повисока цена за еден денар. Просечното зголемување на малопродажните цени изнесува 1,55 проценти.
Новите максимални цени се:
- ЕУРОСУПЕР БС-95: 93 денари за литар
- ЕУРОСУПЕР БС-98: 95 денари за литар
- ЕУРОДИЗЕЛ: 100 денари за литар
- Екстралесно масло: 110 денари за литар
Цената на екстралесното масло останува непроменета, додека мазутот поскапува за 1,30 денари и ќе се продава по 55,573 денари за килограм. Од РКЕ објаснуваат дека при пресметката биле земени предвид движењата на референтните цени на нафтените деривати на светскиот пазар и промената на курсот на денарот во однос на доларот.
Во пресметката се вклучени и владините мерки за намален ДДВ за дизелот и пониски акцизи за бензините и дизел-горивото.
Од Комисијата појаснуваат дека станува збор за максимални малопродажни цени, што значи дека бензинските пумпи можат да ги продаваат горивата и поевтино од утврдените износи.
