ДРАМА КАЈ СТРУМИЦА Голем пожар ја зафати дивата депонија меѓу Дабиле и Петралинци
Сè уште нема информации за причините за пожарот и за евентуалната материјална штета.
Голем пожар избувна од синоќа на дива депонија меѓу селата Дабиле и Петралинци, информираат од Територијалната противпожарна единица (ТППЕ) Струмица.
Според информациите објавени од струмичките пожарникари, огнот зафатил голема површина од дивата депонија, по што противпожарни екипи излегле на терен и интервенираат за локализирање на пожарот и спречување на неговото понатамошно ширење.
Од ТППЕ Струмица предупредуваат дека пожарите на дивите депонии претставуваат сериозна закана за животната средина и квалитетот на воздухот. При согорувањето на отпадот се ослободуваат чад и потенцијално штетни материи кои можат да го загадат воздухот.
Засега нема дополнителни информации за тоа што го предизвикало пожарот, ниту дали е причинета материјална штета. Се очекуваат повеќе информации за текот на интервенцијата и состојбата на теренот.
