МАКФЕСТ ПОВТОРНО ГО КРЕВА ФЕСТИВАЛСКИОТ ДУХ Нови песни, познати автори и музичка енергија во Штип

Штип повторно ќе биде во знакот на музиката. На 30 и 31 октомври ќе се одржи 41. издание на „Макфест“, фестивалот кој повеќе од четири децении е едно од препознатливите места за македонската забавна музика.

Годинава публиката ја очекуваат нови песни, различни музички изрази, познати автори и изведувачи, но и нови имиња кои допрва ќе ја бараат својата публика.

Меѓу авторите на годинашните композиции се низа добро познати имиња од македонската музичка сцена – Ристо Самарџиев, Хари Котларовски, Огнен Неделковски, Лазар Цветковски, Раде Врчаковски – Врчак, Александар Масевски, Кристијан Габроски, Иван Јованов, Роберт Билбилов, Андријана Јаневска, Давор Јордановски, Елвир Мекиќ, Димитар Андоновски и Јован Јованов, како и други автори.

Уметничкиот директор на „Макфест“, Роберт Саздов, очекува годинашното издание да донесе песни со различен карактер – од композиции кои веднаш влегуваат во уво до оние кои својата публика ќе ја освојуваат со текот на времето.

„Годинава имаме навистина интересен избор на автори – докажани музички имиња, автори со свој препознатлив стил и песни зад кои стои големо искуство“, вели Саздов.

Според него, токму разновидноста е една од убавините на „Макфест“, бидејќи дел од песните можат да останат актуелни и по завршувањето на фестивалските вечери.

Со годинашното издание, фестивалот продолжува да ја гради својата повеќедецениска музичка приказна, но истовремено отвора простор и за нови автори и изведувачи.

Штип на крајот на октомври повторно ќе биде сцена на која ќе се сретнат искусните имиња од македонската музика и оние кои допрва треба да го направат својот чекор пред фестивалската публика.

Во центарот, како и досега, остануваат песната, музиката и фестивалската атмосфера.