СКОРО 71.000 ДЕНАРИ ЗА ПРЕЖИВУВАЊЕ, А СО КИРИЈА НАД 86.000 Еве колку чини минималниот живот во Македонија

Според пресметките на ССМ, на едно четиричлено семејство му се потребни 469 денари повеќе отколку минатиот месец, а за оние што живеат под кирија минималните трошоци надминуваат 86.000 денари.

СКОРО 71.000 ДЕНАРИ ЗА ПРЕЖИВУВАЊЕ, А СО КИРИЈА НАД 86.000 Еве колку чини минималниот живот во Македонија
Фото: Принтскрин

Вредноста на синдикалната минимална кошница за ноември 2026 година достигна 70.827 денари, што е зголемување за 469 денари во споредба со октомври, кога изнесуваше 70.358 денари, соопшти Сојузот на синдикатите на Македонија (ССМ).

Уште поголем товар имаат семејствата кои немаат сопствен дом и живеат под кирија. За нив, минималните месечни трошоци за живот достигнуваат 86.202 денари, доколку изнајмуваат стан од 60 квадратни метри. Тоа значи дека само за покривање на основните животни потреби, без дополнителни непредвидени трошоци, на едно семејство му се потребни повеќе од 86.000 денари месечно.

Најголемиот дел од минималната синдикална кошница и овој месец отпаѓа на храна и пијалаци, за кои се потребни 25.902 денари, односно 36,6 проценти од вкупните трошоци. Според структурата на кошницата, останатите месечни потреби се распределени вака:

  • Облека и обувки – 6.684 денари.

  • Станарина, вода, електрична енергија и греење – 6.379 денари.

  • Лична хигиена и хигиена во домот – 2.704 денари.

  • Здравје – 1.201 денар.

  • Транспорт – 5.105 денари.

  • Комуникации – 3.677 денари.

  • Рекреација и култура – 6.592 денари.

  • Образование – 7.192 денари.

  • Ресторани и хотели – 4.291 денар.

  • Останати стоки и услуги – 1.100 денари.

За домаќинствата кои живеат во изнајмен стан од 60 квадратни метри, трошоците за станарина, вода, електрична енергија и греење изнесуваат 21.754 денари. Со оваа дополнителна ставка, вкупната минимална синдикална кошница достигнува 86.202 денари.

Податоците на ССМ повторно го покажуваат финансискиот притисок со кој се соочуваат домаќинствата, особено семејствата кои немаат сопствен стан и значителен дел од своите приходи мораат да издвојуваат за кирија и основните животни потреби.

CATEGORIES
Share This