НОВ УДАР ЗА МАКЕДОНИЈА 0:2 во Љубљана и аларм пред најтешките мечеви

Македонската фудбалска репрезентација не успеа да дојде до позитивен резултат ниту на вториот натпревар од новата Лига на нации. „Црвено-жолтите“ загубија со 2:0 на гостувањето кај Словенија и останаа без постигнат гол по првите два меча.

По поразот од Швајцарија на домашен терен, очекувањата беа дека Македонија во Љубљана ќе покаже подобро издание. Сепак, наместо тоа, повторно имаше проблеми во сите линии – Словенија беше доминантна, македонската одбрана не делуваше сигурно, а нападот повторно остана без вистинска идеја и конкретна завршница.

По двата натпревари, Македонија има два порази и гол-разлика 0:4, што јасно покажува дека стартот на ова издание од Лигата на нации не се одвива според посакуваното.

Випотник ја предупреди Македонија уште на стартот

Словенија уште од самиот почеток ја презеде иницијативата. Веќе во втората минута, Випотник имаше одлична можност да го отвори резултатот, но неговиот удар заврши во гредата од голот на Димитриевски.

Македонија тешко воспоставуваше контрола врз играта, а домаќинот продолжи да создава шанси.

Елези со единствената сериозна шанса

Нашата репрезентација во првиот дел имаше една посериозна можност. Агон Елези се најде во добра позиција во шеснаесетникот на Словенија и упати удар кон голот, но топката по блокот заврши само неколку сантиметри покрај голот на домаќините.

Тоа практично беше најсериозната закана на Македонија во првото полувреме.

Од другата страна, Випотник продолжи да биде најопасен играч на Словенија и до паузата имаше уште две добри можности за погодок. Сепак, словенечкиот напаѓач не успеа да ја реализира ниту една од нив, па Македонија на одмор замина без примен гол.

Но, играта не оставаше простор за оптимизам – домаќинот беше поконкретен, а Македонија повторно имаше сериозни проблеми да создаде шанса пред противничкиот гол.

Пред Македонија сега се уште два исклучително тешки натпревари – дуелот со Шкотска на домашен терен и гостувањето кај Швајцарија.