СООБРАЌАЈОТ НЕПРЕЧЕН Но АМСМ предупредува на одрони и изменети режими
Умерена фреквенција на патиштата и без подолги задржувања на границите, но возачите да внимаваат на повеќе делници со градежни работи.
Сообраќајот на државните патишта се одвива непречено и по суви коловози, информира АМСМ. Интензитетот на сообраќајот надвор од градските средини е умерен, додека на граничните премини од македонска страна нема подолги задржувања за влез и излез од државата.
АМСМ апелира до возачите да ја прилагодат брзината, да ја почитуваат поставената сообраќајна сигнализација и да бидат особено внимателни на патиштата низ котлини, речни долини и клисури, каде постои можност од појава на одрони.
Посебно внимание се препорачува на делниците Катланово – Велес, Маврово – Дебар – Струга, Виница – Берово и Кочани – Делчево.
Изменет режим на повеќе патни правци
Поради градежни активности, на повеќе делници во државата е воспоставен времен режим на сообраќај.
- На граничниот премин Делчево од 9 септември 2026 година има времен режим поради реконструкција. Преминот функционира непрекинато.
- До 1 октомври 2026 година е изменет режимот пред наплатната станица Преод, поради санација на косина на автопатот А4 на делницата Миладиновци – Свети Николе – Штип.
- Во Штип, на Р1204, е во сила времена измена на сообраќајот поради санација на мостот на реката Брегалница.
- На регионалниот пат Р1202 Косоврасти – Мелнички Мост има изменет режим поради санација на свлечиште.
- На патниот правец Прилеп – Битола, во рамки на изградбата на Коридор 10Д, сообраќајот се пренасочува по регионалниот пат во делот од клучката Лагово до Тополчани.
- На регионалниот пат Прилеп – Крушево – Сладуево има целосно затворање на делницата Мало Коњари – Кривогаштани, до завршување на градежните активности.
- На патниот правец ГП Блаце – Скопје се изведуваат градежни работи на повеќе делници, со воспоставен времен режим.
- На Кичево – Охрид сообраќајот се одвива со девијации поради градежни работи на повеќе делници.
Отворен патот Охрид – Ресен преку Галичица
Од 15 април патниот правец Охрид – Ресен преку Националниот парк Галичица е отворен за сообраќај за сите видови возила до 3,5 тони.
Движење низ Јасен
На релацијата Скопје – Македонски Брод сообраќајот низ Јасен се одвива во термините: 07:30–09:00, 12:00–12:45 и 16:00–18:00 часот.
Во спротивна насока, Македонски Брод – Скопје, термините се: 06:00–07:00, 10:30–11:00, 13:00–13:45 и 18:30–20:00 часот.
