БОЖИНОВСКА БАРА ИЗВИНУВАЊЕ – СДСМ одбива

Министерката за енергетика Сања Божиновска ги отфрли обвинувањата на СДСМ за нејзината наводна поврзаност со компанијата „Руднап“ и со набавката на броила за ЕВН, оценувајќи ги како „лаги и тенденциозни конструкции“.

Божиновска тврди дека повеќе од 12 години нема никаква деловна или приватна релација со „Руднап“, ниту, како што вели, има каква било поврзаност со набавката на броилата.

„Категорично ги отфрлам и ги демантирам лагите и тенденциозните конструкции што СДСМ ги изнесе на прес-конференцијата на 20 септември 2026 година, со кои без ниту еден доказ се прави обид да се нарушат мојата чест, углед и професионален интегритет“, изјави министерката.

Таа посочува дека постапката за набавка ја спроведува ЕВН како приватна компанија, самостојно и за сопствени потреби.

БОЖИНОВСКА: ОВА Е ПОЛИТИЧКА ДИСКРЕДИТАЦИЈА

Според Божиновска, СДСМ пласира невистини за наводна вмешаност во деловни зделки без да понуди докази за своите тврдења.

Таа порача дека политичката борба, како што вели, не може да биде оправдување за клеветење и нарушување на личниот и професионалниот углед.

Божиновска побара СДСМ во рок од 24 часа јавно да ги повлече тврдењата и да ѝ се извини.

Во спротивно, најави преземање правни дејствија, вклучително и судска постапка и пријави до надлежните институции.

„Јавноста заслужува факти и докази, а не политички конструкции. Јас сум подготвена за секој факт да одговорам и да го докажам. Истото го очекувам и од оние што денес изнесуваат вакви сериозни обвинувања“, порача министерката.

СДСМ: НЕМА ИЗВИНУВАЊЕ, БАРАМЕ ОБВИНИТЕЛСТВОТО ДА РЕАГИРА

Од СДСМ возвратија дека нема да ѝ се извинат на Божиновска и дека нивните тврдења се темелат на, како што велат, документирани податоци.

Опозициската партија тврди дека Божиновска во периодот од 2011 до 2014 година била извршен директор на „Руднап Група“ за Централна и Источна Европа, а од март 2012 до март 2014 година и управител на „Руднап Бугарија“.

Од СДСМ наведуваат и дека нејзиното име се појавува во корпоративна документација поврзана со компанијата во Хрватска, како и дека претходно, од 2006 до 2011 година, работела во „ЕЗПАДА“, компанија за меѓународна трговија со електрична енергија.

ВО ЦЕНТАРОТ И ДОГОВОРОТ ЗА БРОИЛА ОД 13,2 МИЛИОНИ ЕВРА

СДСМ ја поврзува целата ситуација и со договорот што, според партијата, ЕВН на 11 август 2026 година го склучила со српската компанија „METER&CONTROL“, во вредност од околу 13,2 милиони евра, за набавка на броила.

Од СДСМ тврдат дека компанијата е поврзана со деловната мрежа на Војин Лазаревиќ, но овие тврдења ги претставуваат како свои наводи и барања за институционална проверка.

Опозицијата во своето соопштение ја споменува и улогата на Душан Адамовиќ, кого го опишува како наводен „мост“ меѓу Лазаревиќ и актуелната власт, притоа изнесувајќи низа сериозни тврдења за неговото минато и деловни врски.

СДСМ: НАМЕСТО ИЗВИНУВАЊЕ – ИСТРАГА

Од СДСМ инсистираат дека наместо барање за извинување, случајот треба да биде проверен од надлежните институции.

„Фактите не се лаги. Тие се регистар“, велат од партијата, повикувајќи го Обвинителството да отвори постапка и да ги провери наводите.

Така, наместо најавеното извинување во рок од 24 часа, политичкиот спор меѓу министерката за енергетика и СДСМ сега се префрла и на теренот на институционална проверка – со спротивставени тврдења за нејзините поранешни деловни ангажмани, „Руднап“ и набавката на броила за ЕВН.