ПЕЗЕШКИЈАН СО ЖЕСТОКА ПОРAКА ДО ТРАМП: ИРАН НЕМА ДА СЕ ПРЕДАДЕ – Немате човечност, зошто ни ја напаѓате инфраструктурата

Иранскиот претседател Масуд Пезешкијан денеска порача дека притисокот од Соединетите Американски Држави нема да го натера Иран да се предаде. Тој ги обвини САД дека преку напади врз цивилната инфраструктура и ограничување на пристапот до основните ресурси се обидуваат да го принудат иранскиот народ на капитулација.

„Бидејќи САД не можат да го принудат иранскиот народ да се предаде, со малтретирање се обидуваат да го принудат на капитулација, лишувајќи го од средствата за живот и основните ресурси. Но, иранскиот народ нема да попушти“, рече Пезешкијан, пренесува „Ал Џезира“.

Тој го доведе во прашање односот на Вашингтон кон цивилното население.

„Што им е со лебот, средствата за живот и инфраструктурата на народот? Ако поседуваат човечност, зошто им го прекинуваат пристапот на луѓето до храна и вода?“, праша иранскиот претседател.

Според „Ројтерс“, постојат веродостојни докази кои укажуваат дека американската војска во неколку наврати таргетирала иранска цивилна инфраструктура за време на конфликтот. Ирански претставници го обвинуваат американскиот претседател Доналд Трамп дека наредил такви напади со цел да изврши дополнителен притисок врз Техеран.

Техеран најавува посилни контранапади

Претходно, неименуван ирански функционер изјави дека Иран е подготвен дополнително да го интензивира конфликтот со САД. Според него, Техеран ќе ги засили контранападите доколку Вашингтон продолжи со нападите врз иранската територија и инфраструктура.

Функционерот за „Блумберг“ изјавил дека економскиот притисок врз Иран се зголемува, но раководството во Техеран конфликтот го доживува како егзистенцијална закана и смета дека има малку избор освен да продолжи со борбата.

Иран тврди дека ги обновува воените капацитети

Според иранскиот функционер, земјата ги обновува своите воени капацитети од април и располага со доволен број ракети за да продолжи со конфликтот подолг период.

Тој призна дека економската состојба во земјата се влошува, но посочи дека иранското раководство смета дека борбата мора да продолжи сè додека не добие гаранции дека Вашингтон во иднина ќе се воздржи од повторни напади.

Ставовите на Техеран укажуваат дека, и покрај зголемениот економски притисок, иранското раководство засега не покажува подготвеност за капитулација и најавува продолжување на воениот отпор.