ВОЗАЧИТЕ, ВНИМАВАЈТЕ Ако сте сами во автомобилот, оваа грешка може да ве чини 200 евра
Камери веќе го бројат бројот на патници во возилата - оние кои сами се движат во посебна лента добиваат казни без да бидат запрени
Во Европа сè почесто се воведуваат построги правила за користење на сообраќајните ленти наменети за возила со повеќе патници. Возачите кои во автомобилот се сами, а се движат по ваква лента, можат да бидат регистрирани од камери и да добијат високи парични казни.
Станува збор за таканаречените HOV или VAO ленти, посебни коловозни ленти наменети за возила со висока исполнетост. Тие се означени со сообраќајна сигнализација, а условот за нивно користење најчесто е во возилото да има најмалку две лица.
Правилата не се исти насекаде и зависат од конкретната делница, па возачите мора внимателно да ја следат поставената сигнализација.
Шпанија воведува сè пософистициран надзор
Во Шпанија дополнително се развива системот за контрола на HOV/VAO лентите. Камерите можат истовремено да ги читаат регистарските таблички и да го утврдат бројот на лица во возилото.
На тој начин, потенцијалниот прекршок може да биде регистриран без полициските службеници воопшто да го запираат автомобилот. За неовластено користење на ваква лента, казната може да достигне 200 евра.
Слична практика веќе постои и во Босна и Херцеговина, но таму контролата и санкционирањето не се спроведуваат на ист начин како во Шпанија.
Во Париз казната е 135 евра
Франција, пак, веќе активно ги санкционира возачите кои сами се движат по лентите наменети за заедничко патување.
Од 3 март 2025 година, дел од парискиот „Булевар Периферик“ има посебна лента наменета за возила со најмалку две лица. Лентата може да ја користат и јавниот превоз, такси-возилата и одредени други категории возила.
Правилото важи во работните денови, во периодите на утринскиот и попладневниот сообраќаен шпиц. Возачите кои ќе го прекршат можат да бидат казнети со 135 евра.
Камерите „гледаат“ и на задните седишта
Француските власти користат видео-системи кои можат да го детектираат бројот на патници во автомобилот, вклучително и лицата на предните и задните седишта, а истовремено ги читаат и регистарските таблички.
Кога системот ќе регистрира потенцијален прекршок, случајот дополнително го разгледува овластено лице пред да биде изречена казната.
Целта е помалку автомобили на патиштата
И Шпанија и Франција овие мерки ги оправдуваат со борбата против сообраќајниот метеж, намалувањето на бројот на автомобили во градските средини и ограничувањето на штетните емисии.
Пораката до возачите е едноставна: не е проблем да се возите сами во автомобилот, туку проблем настанува ако сами се вклучите во лента резервирана за возила со повеќе патници.
Целта на ваквите мерки е да се поттикне заедничкото патување и повеќе луѓе да користат едно возило, наместо секој поединечно да се движи со свој автомобил.
