ЖЕСТОК СУДИР ВО СОБРАНИЕТО Пропадна обидот за смена на Сања Божиновска, мнозинството застана зад министерката
Опозицијата упати сериозни критики за состојбите во енергетскиот сектор, додека власта возврати со аргументи за реализирани реформи, инвестиции и мерки за стабилност.
Министерката за енергетика, рударство и минерални суровини Сања Божиновска ја доби поддршката од собраниското мнозинство, откако пратениците ја отфрлија интерпелацијата за нејзината работа, поднесена од опозициската Левица.
На гласањето, 19 пратеници се изјаснија „за“ интерпелацијата, додека 63 гласаа „против“, со што иницијативата не го доби потребното мнозинство. Собраниската расправа помина во спротивставени ставови за резултатите од работењето на Министерството за енергетика.
Опозициските пратеници упатија критики за недоволните резултати и посочија на наводни неправилности во енергетскиот сектор, доведувајќи ја во прашање успешноста на политиките што ги спроведува министерката. Од друга страна, претставниците на владејачкото мнозинство застанаа во одбрана на Божиновска, нагласувајќи ги реформските процеси, инвестициите и преземените мерки за обезбедување енергетска стабилност.
Во своето обраќање пред пратениците, министерката порача дека секое обвинување за нејзината работа мора да биде поткрепено со конкретни докази. Таа истакна дека е подготвена да одговара пред Собранието за своите постапки и резултати, нагласувајќи ја важноста на аргументирана расправа за состојбите во енергетскиот сектор.
Со отфрлањето на интерпелацијата, Божиновска ја задржа политичката поддршка од парламентарното мнозинство, додека разликите меѓу власта и опозицијата околу управувањето со енергетскиот сектор останаа во фокусот на собраниската дебата.
БОЖИНОВСКА ИМ ФРЛИ РАКАВИЦА НА ПОДНЕСУВАЧИТЕ НА ИНТЕРПЕЛАЦИЈАТА Преземете одговорност за тврдењата
