ПОЖАРИ НАСЕКАДЕ НИЗ МАКЕДОНИЈА 22 огнени жаришта, еве каде гореше

Вкупно 22 пожари на отворен простор се регистрирани до 07:30 часот утрово, соопшти Центарот за управување со кризи (ЦУК). Според информациите, нема активни пожари ниту пожари под контрола, а сите 22 интервенции се завршени со нивно гаснење. Пожари биле регистрирани на повеќе локации низ земјава, при што најчесто гореле ниска вегетација, сува трева, грмушки, отпад и депонии.

Во Општина Чучер Сандево биле изгаснати пожари кај селата Глуво, Мирковци и Кучевишка Бара, каде гореле ниска вегетација и грмушки.

Во Скопје, пожари имало на улицата „Скупи“ кај сервисот „Агромеханика“, во Скопско Поле покрај пругата, во Стопански Двор, на булеварот „Гоце Делчев“, како и во други делови од градот. Гореле ниска вегетација, грмушки, отпад и дрво.

Во Битола биле регистрирани два пожара во пределот на Тумбе Кафе и кај Зоолошката градина, каде гореле отпад и сува трева.

Во Прилеп интервенции имало на улицата „Дебарска“, кај местото Теќе, каде горела депонија, како и во селото Ракле, каде горела ниска вегетација.

Пожари на ниска вегетација биле изгаснати и во Струга, во селата Лабуништа, Калишта и Ливада.

Во Крива Паланка, пожарот бил во селото Мождивњак, на местото Острец, каде гореле дабова шума и ниска вегетација.

Интервенции имало и во Тетово, во близина на ресторанот „Сирач“, во Желино, кај селото Лешница, во Кавадарци, на локалитетот Раец кон селата Дреново и Ќесендре, како и во Куманово, во селото Рамановце и населбата Пуковско.

Пожари биле изгаснати и во Арачиново, каде горела депонија, како и во Гостивар, во селото Тумчевиште.

Од ЦУК нагласуваат дека во моментот нема активни пожари на отворен простор, а сите регистрирани пожари се изгаснати.