(ВИДЕО) ДРОН ПАДНА НА ПРЕПОЛНА ПЛАЖА Шестмина загинати, меѓу нив и три деца, 40 повредени

Шест лица, меѓу кои три деца, загинаа, а околу 40 се повредени во инцидент на преполна плажа во близина на рускиот црноморски град Геленџик, кој руските власти го опишаа како украински напад со беспилотно летало. Гувернерот на Краснодарската област, Венијамин Кондратиев, изјави дека делови од соборен дрон паднале во туристичкото одморалиште Архипо-Осиповка, при што биле погодени цивилни објекти.

Од повредените, 17 лица се хоспитализирани, додека спасувачките и специјалните служби веднаш биле испратени на местото на инцидентот. Кондратиев изјави дека нападот бил насочен кон цивилна инфраструктура и му наложил на градоначалникот на Геленџик, Алексеј Богодистов, да обезбеди помош за повредените и семејствата на загинатите.

На социјалните мрежи набргу се појави видео на кое, наводно, се гледа како беспилотно летало паѓа во близина на луѓе на плажа, по што следува експлозија. Автентичноста и околностите на снимката не се независно потврдени. Руските власти не потврдија дека дронот директно паднал меѓу капачите. Според досегашните официјални информации, жртвите настрадале од остатоците на беспилотното летало откако било соборено. Руските медиуми, сепак, објавија сведоштва на лица кои тврдат дека беспилотни летала летале директно над плажата. Според едно сведоштво, луѓето во паника се засолнувале зад карпите и лежалките.

Инцидентот привлече дополнително внимание поради близината на местото на падот до луксузниот комплекс на брегот на Црното Море, кој во руските и странските медиуми често се нарекува „Путинова палата“. Комплексот, чија вредност во медиумите се проценува на повеќе од една милијарда евра, со години е предмет на јавни полемики. За неговата изградба уште во 2010 година зборуваше поранешниот руски информатор Сергеј Колесников, кој упати отворено писмо до тогашниот претседател Дмитриј Медведев.

Владимир Путин ги отфрли тврдењата дека комплексот е негов, додека Кремљ соопшти дека станува збор за приватен проект во сопственост на бизнисмени. Областа околу комплексот е под строго обезбедување, а воздушниот простор над него е ограничен. Руската Федерална служба за безбедност (ФСБ) наведе дека мерките се преземени поради зголемена активност на странски разузнавачки служби.

Во текот на ноќта во Геленџик беше објавена опасност од напади со беспилотни летала, а локалните жители пријавиле дека слушнале дејствување на противвоздушната одбрана. Руското Министерство за одбрана соопшти дека во периодот од вечерта на 2 август до утрото на 3 август биле пресретнати или уништени вкупно 131 украински дрон над повеќе руски региони, Крим и областа на Црното Море. Украинските власти засега не ги коментираа тврдењата на Москва.

Само еден ден претходно, според руските медиуми, бил регистриран уште еден напад со беспилотно летало во Белгородската област. Дронот, според овие информации, паднал во близина на детско игралиште во селото Принчевка. Во инцидентот загинало 13-годишно девојче, додека биле повредени уште две девојчиња, на возраст од седум и девет години. Руските тврдења за нападите и околностите на инцидентите не можеа независно да бидат потврдени.

In Gelendzhik, Russia, a drone crashed directly onto a beach with tourists.

At least 3 people were killed and 13 others injured. pic.twitter.com/UAhg7uSBPH

— Visegrád 24 (@visegrad24) August 3, 2026