НЕТАНЈАХУ СО ТЕШКО ПРЕДУПРЕДУВАЊЕ ДО ИРАН Ќе направите голема грешка ако нè нападнете

Израелскиот премиер Бенјамин Нетанјаху изјави дека Израел и Соединетите Американски Држави имаат заедничка цел кога станува збор за Иран и спречување Техеран да развие или поседува нуклеарно оружје. Во интервју за американската телевизија ABC News, Нетанјаху оцени дека американскиот претседател Доналд Трамп има три можни патишта во однос на иранската нуклеарна програма: постигнување дипломатски договор, продолжување на економскиот и политичкиот притисок или преземање воена акција.

„Сè што ќе доведе до крај на нуклеарната програма на Иран е она што го сакаме. Тоа е нашата заедничка цел“, изјави Нетанјаху.

Тој ги отфрли тврдењата дека се обидел да го убеди Трамп да продолжи со нападите врз Иран за време на нивната средба во Белата куќа.

„Не го доведов во заблуда. Никој не му кажува на претседателот Трамп што да прави“, рече израелскиот премиер, додавајќи дека Трамп и претходно јавно посочил дека Иран не смее да има нуклеарно оружје.

Нетанјаху изрази недоверба кон иранското раководство, обвинувајќи го дека „лаже, измамува и купува време“, но остави отворена можноста силниот дипломатски и економски притисок да доведе до промена на ситуацијата. Според него, Иран денес е послаб од кога било, додека Израел е посилен од кога било досега. Тој сепак нагласи дека не може да каже дека иранскиот режим е пред пад, но смета дека големиот јаз меѓу властите и народот може еден ден да доведе до негово распаѓање. Израелскиот премиер упати предупредување дека евентуален напад од Иран би бил „голема грешка“, а одговорот на Израел би бил „многу силен“.

Во однос на односите со Вашингтон, Нетанјаху ги опиша САД како „висок партнер“ и нагласи дека двете земји се сојузници. Тој исто така ги отфрли обвинувањата дека Израел извршил воени злосторства или геноцид во Газа, нарекувајќи ги таквите тврдења „глупости“. Нетанјаху изјави дека израелската армија ги предупредувала цивилите да ги напуштат борбените зони, додека Хамас, според него, го спречувал нивното заминување. За можноста за создавање палестинска држава, Нетанјаху повторно изрази негативен став.

„Имавме една. Се викаше Газа. И за што беше искористена? За започнување ужасен масакр против нас“, изјави тој.

Тој оцени дека иднината на Газа зависи од нејзината демилитаризација и дерадикализација, како и од разоружување на Хамас. Коментирајќи го прашањето зошто на независни новинари не им е дозволен слободен влез во Газа без придружба на израелските сили, Нетанјаху рече дека станува збор за воена зона со ракетни напади, мини и тунели.

Во врска со насилството на Западниот Брег, тој изјави дека израелските власти преземаат мерки против нападите врз цивили, но дека нема да дозволат одмаздничко насилство од страна на израелски екстремисти.