ЗГОЛЕМЕНА ФРЕКВЕНЦИЈА НА ПАТИШТАТА Еве каде се чека 15 минути и на кои делници има опасност од одрони

Сообраќајот на државните патишта во земјава се одвива непречено, а коловозите се суви.

Зголемен е интензитетот на сообраќајот на патните правци надвор од градските средини. Поголема фреквенција на возила е регистрирана на граничниот премин Богородица, каде времето на чекање е околу 15 минути. На останатите гранични премини од македонска страна нема подолги задржувања при влез и излез од државата.

Од АМСМ апелираат до возачите да ја прилагодат брзината, да ја почитуваат поставената сообраќајна сигнализација и внимателно да управуваат со возилата. Посебно внимание се препорачува на патиштата низ котлините, речните долини и клисурите, каде постои можност од појава на одрони.

На зголемен ризик од одрони се посочуваат делниците Катланово – Велес, Маврово – Дебар – Струга, Виница – Берово и Кочани – Делчево.

Во рамки на сезонскиот режим на сообраќај, од 15 април патниот правец Охрид – Ресен, преку Националниот парк „Галичица“, е отворен за сообраќај за сите видови возила со вкупна маса до 3,5 тони.