ПРЕДУПРЕДУВАЊЕ ОД ИРАН Непријателот ќе биде изненаден кога најмалку очекува
Ирански генерал тврди дека воената стратегија на Техеран е променета и дека земјата е подготвена за „превентивни операции“ доколку биде донесена таква одлука.
Иранскиот генерал Ахмад Реза Пурдастан изјави дека воената стратегија на Техеран претрпела значителна промена и од досегашна одбранбена поставеност кон офанзивна доктрина, која вклучува можност за превентивни операции.
Во интервју за иранските медиуми, Пурдастан нагласи дека вооружените сили на земјата се подготвени да спроведат „изненадувачки превентивни операции“ доколку таква одлука биде донесена од државното раководство.
„Превентивните операции се дел од офанзивната доктрина. Ако естаблишментот го побара тоа, можеме да го изненадиме непријателот и да дејствуваме во области каде што тоа не го очекува“, изјави генералот.
Тој додаде дека Иран сè уште не ги активирал сите свои воени капацитети и предупреди дека секоја грешка на противниците би можела да предизвика одговор кој, според него, би се проширил и надвор од иранските граници, вклучително и преку Хормутскиот Теснец.
Осврнувајќи се на неодамнешните конфликти, Пурдастан оцени дека Иран и неговите сојузници успешно се спротивставиле на, како што го нарече, „нееднаквиот конфликт“ со коалиција предводена од САД.
Според него, најголем показател за успехот било барањето за прекин на огнот од страна на противниците. Тој тврди дека долгогодишните санкции не ја ослабиле способноста на Иран да се спротивстави на притисоците.
Генералот се осврна и на состојбата во Либан, нагласувајќи дека Иран е подготвен да го поддржи и брани либанскиот народ, без да наведе конкретни детали за можни идни операции.
