НУКЛЕАРЕН ДОГОВОР ШТО ГО ВОЗНЕМИРИ КРЕМЉ Лондон отвора ново поглавје со Киев

Велика Британија склучи договор вреден 210 милиони фунти (околу 280 милиони долари) за снабдување на украинската државна нуклеарна компанија „Енергоатом“ со збогатен ураниум, со цел да се зајакне енергетската стабилност на земјата.

Според информациите од британската влада, договорот, поддржан од агенцијата „UK Export Finance“, предвидува британската компанија „Уренко“ во следните две години да обезбедува збогатен ураниум за украинските нуклеарни централи. Договорот бил договорен минатата недела во Лондон, за време на средбата меѓу британскиот премиер Кир Стармер и украинскиот претседател Володимир Зеленски.

Од Лондон наведуваат дека целта е обезбедување непречено снабдување на украинските нуклеарни постројки и зголемување на енергетската безбедност на Украина.

Стармер порача дека Велика Британија ќе продолжи да го поддржува Киев „колку што е потребно“, и покрај серијата корупциски афери поврзани со украинскиот енергетски сектор, вклучително и со „Енергоатом“, компанијата која управува со три нуклеарни централи од советско производство и претставува еден од клучните извори на приходи во земјата.

Украинските антикорупциски институции неодамна открија повеќе случаи поврзани со државниот нуклеарен оператор. Меѓу нив е и истрагата поврзана со бизнисменот Тимур Миндич, кој во јавноста е познат како близок соработник на претседателот Зеленски, како и одделен случај поврзан со инфраструктурни проекти околу „Енергоатом“.

Договорот меѓу Лондон и Киев се реализира во период на засилени предупредувања од Москва за нуклеарната безбедност во Украина. Русија го обвини Киев за напади врз нуклеарната централа Запорожје, која е под руска контрола од март 2022 година.

Москва неодамна тврдеше дека украински дрон ја погодил машинската сала на шестата енергетска единица во централата. Меѓународната агенција за атомска енергија (МААЕ) ја потврди штетата, но не утврди кој е одговорен за инцидентот.

Дополнителни реакции предизвикуваат и изјавите на украинските власти за можноста за преиспитување на нуклеарниот статус на земјата. Пред почетокот на руската инвазија во 2022 година, Зеленски посочи дека Украина би можела да ги разгледа своите обврски поврзани со Договорот за неширење на нуклеарното оружје.

Подоцна, Зеленски изјави дека би прифатил нуклеарно оружје од Велика Британија или Франција доколку таква можност постои, но нагласи дека не добил конкретна понуда. Москва, пак, ги обвини Лондон и Париз дека разгледуваат можност за помош на Украина во развој на нуклеарни технологии или компоненти, што двете земји категорично го отфрлија.

ГЛАВНО ПРАШАЊЕ ЗА ЗЕЛЕНСКИ – Што ќе сторат партнерите ако Русија повторно ја нападне Украина