ЗАБОРАВЕН СКАНДАЛОТ СО НЕПОТРЕБНИ СРЦЕВИ ОПЕРАЦИИ ЗА ПРОФИТ – Што се случи со случајот што ја потресе јавноста?

Случајот со неоправдани кардиолошки интервенции во приватни здравствени установи со цел остварување профит, кој во август 2025 година го отвори кардиологот Сашко Кедев, со месеци е во застој и речиси паднат во заборав.

Тогашниот министер за здравство, Азир Алиу, најави темелна истрага и посочи дека ќе бидат вклучени и странски експерти. Во јавноста изјави дека веќе се идентификувани неколку сомнителни случаи и дека истрагата наскоро ќе даде целосни одговори. Сепак, наместо конкретни информации за инволвирани лица и установи, јавноста засега не доби јасни резултати, а случајот остана без видлив напредок.

Ова предизвикува сомнежи дали целиот процес ќе заврши без епилог, како што се случувало и во други слични случаи. Засега нема официјални информации за завршена истрага, а впечатокот е дека постапката е закочена.

На прес-конференција лани во ноември, министерот Алиу и членовите на домашната комисија соопштија дека од вкупно 25 пријави за сомнителни случаи, поднесени од граѓани и здравствени институции, биле анализирани 19. Кај 10 пациенти било утврдено дека постоеле индиции за непотребно упатување на васкуларни интервенции. Овие наоди укажуваат на можни сериозни неправилности, вклучително и интервенции мотивирани од финансиски интерес, што претставува сериозно загрозување на здравјето на пациентите.

Јавноста и понатаму бара одговори за тоа кои се инволвираните лица, каде се изведувале интервенциите и со каква цел. Институциите, од своја страна, се во обврска да обезбедат транспарентност и конкретни резултати, а не само најави за истраги.

НЕПОТРЕБНИ СТЕНТИРАЊА ЗА ПРОФИТ – Ова е составот на странската комисија