ОПАСНИ ИГРИ ВО ЕВРОПА – Тврдења за воени сценарија околу Калининград

Според изјави на претставник на руското Министерство за надворешни работи, Артјом Булатов, НАТО наводно во рамки на воени вежби разработува сценарија поврзани со ограничување и можно изолирање на регионот Калининград. Тој ова го изјави во интервју за РИА Новости.

Булатов тврди дека по почетокот на „специјалната воена операција“, НАТО и Европската Унија ги засилиле активностите за контрола на логистичките рути во Балтичкиот регион. Според него, се преземаат мерки кои би можеле да ги ограничат транспортните врски со Калининград и да создадат услови за негова изолација во случај на натамошна ескалација на односите меѓу Русија и Западот.

Тој додава дека вакви сценарија се дел од воените вежби на НАТО, каде, како што вели, се симулираат различни ситуации во регионот.

Слични тврдења изнесе и заменик-министерот за надворешни работи на Русија, Александар Грушко, кој исто така за РИА Новости изјави дека во западните воени вежби се разгледуваат сценарија за поморска блокада и можни операции поврзани со Калининград.

Претходно, поранешен заменик-министер за надворешни работи на Литванија, Дариус Јургељавичус, изјавил дека во рамки на НАТО постојат планови за блокада на Калининград во случај на директен конфликт со Русија.

Булатов дополнително предупреди дека Русија би реагирала на секој обид за ограничување или изолација на регионот, повикувајќи се и на пораки од руското раководство за можни сериозни последици во таков развој на настаните.