БОЖИНОВСКА СО СИЛНА ПОРАКА ЗА 1 МАЈ – Без труд нема напредок

Први мај треба да биде потсетник дека начинот на кој се однесуваме кон трудот го одразува типот на држава што ја градиме, напиша денеска министерката за енергетика, рударство и минерални суровини, Сања Божиновска, на својата Фејсбук-страница.

„Први мај за луѓето што ја движат државата. За оние што знаат дека вредноста не доаѓа преку ноќ, туку преку знаење, труд и достоинство. За оние што со право очекуваат нивниот труд да биде видлив, признаен и почитуван“, истакна Божиновска.

Таа нагласи дека без вистинска почит кон трудот нема ниту напредок.

„Успехот секогаш е огледало на тој однос. Како министерка, мојата обврска е јасна да градиме средина во која трудот се вреднува, а довербата се заслужува. Средина во која младите гледаат перспектива, а искусните сигурност. Во која успехот не е привилегија, туку резултат, а секој знае дека неговиот придонес има тежина“, додаде таа.

Божиновска порача дека Први мај треба да биде и потсетник и поттик да се бара повеќе, да се гради подобро и да не се прифаќа помалку од она што се заслужува.

„Среќен 1 Мај – Денот на трудот“, порача министерката.