УЈП ТРГНА СО Е-ФАКТУРА – Компаниите мора да се вклучат или ќе заостанат

Управата за јавни приходи (УЈП) соопшти дека во тек е тестирањето на системот за електронско фактурирање (е-Фактура), при што се проверуваат сервисите за директна интеграција (API) со системот.

Сите компании кои досега не учествувале во тестирањето, а развиваат или одржуваат системи за фактурирање, како и оние чии системи можат да се надградуваат, се повикуваат веднаш да се вклучат во процесот. УЈП нагласува дека учеството во оваа фаза е клучно за навремена подготовка пред задолжителното воведување на системот.

Исклучиво УЈП обезбедува официјални информации, насоки и обуки поврзани со проектот е-Фактура. За поддршка, назначени се даночни агенти кои веќе контактираат со компаниите и нудат совети за успешна имплементација и користење на системот.

За прашања и сугестии, заинтересираните можат да се обратат на контакт-адресата: Kontakt.eFaktura@ujp.gov.mk.
Во најскоро време ќе биде овозможено и тестирање на рачен внес на фактури преку веб-страница и клиентска апликација.