ЕЛ МЕНЧО УБИЕН ВО ОПЕРАЦИЈА НА МЕКСИКАНСКАТА АРМИЈА – Разузнавачки информации од состанок со љубовницата го откриле скривалиштето

Ел Менчо, водачот на мексиканскиот картел „Нова генерација Халиско“ (CJNG), беше смртно ранет за време на голема операција на мексиканските безбедносни сили, објави министерот за одбрана на Мексико, Рикардо Тревиљо Трехо. Настанот беше претставен на претседателката Клаудија Шајнбаум.

Операцијата се реализирала по детално собирање разузнавачки информации. Пресудниот момент се случил кога Ел Менчо се состанал со неговата љубовница и кога таа го напуштила домот во Тапалпа, додека тој останал со своето обезбедување. Ова овозможило властите да го лоцираат нарко-босот и да започнат апсењето.

Во акцијата учествувале специјални воени сили, Националната гарда и воздухопловни единици. Кога телохранителите на Ел Менчо ги забележале безбедносните сили, отвориле оган. Ел Менчо и блиските соработници се обиделе да избегаат во пошумена област, но продолжиле вооружено да се спротивставуваат, вклучувајќи и напади со хеликоптери.

За време на операцијата и насилствата кои следеле, загинале најмалку 72 лица. Меѓу нив, двајца телохранители на Ел Менчо, пет други членови на картелот и самиот Ел Менчо. Уапсени се 70 членови на картелот, а околу 7.000 војници веќе се распоредени во државата Халиско, со дополнителни 2.500 за одвраќање на ескалацијата.

Смртта на Ел Менчо предизвика немири и бран насилство низ неколку мексикански држави, особено во Гвадалахара, каде продолжуваат судирите. Претседателката Шајнбаум нагласи дека најважна е заштитата на населението и дека операцијата била спроведена без учество на странски сили.

Немезио Осегера Сервантес имал 59 години и бил баран и во Мексико и во САД, каде за него била понудена награда од 15 милиони долари. Неговата смрт е голем удар за картелот CJNG, но се очекува период на нестабилност и насилство додека властите ја контролираат ситуацијата.