САД ГО САКААТ ГРЕНЛАНД – Испраќањето на европски војници нема влијание

Белата куќа синоќа соопшти дека состанокот меѓу американските претставници и високите официјални лица на Данска и Гренланд бил продуктивен, но дека испраќањето европски трупи на островот нема да ја промени одлуката на претседателот Доналд Трамп.

Портпаролката на Белата куќа, Каролин Ливит, на прес-конференција рече дека разговорите меѓу данскиот и гренландскиот министер за надворешни работи, Ларс Локе Расмусен и Вивијан Мотцфелт, со американскиот потпретседател Џ.Д. Венс и државниот секретар Марко Рубио биле „продуктивни“. Страните се договориле да формираат работна група која редовно ќе води технички дискусии за „аквизицијата на Гренланд“ на секои две до три недели.

Ливит истакна дека Трамп го ставил својот приоритет многу јасно: тој сака САД да го добијат Гренланд, бидејќи тоа го смета за најдобро за националната безбедност. Испраќањето европски трупи нема да влијае на неговата одлука.

Данските и гренландските власти предупредија дека САД не треба да го окупираат островот и нагласија дека очекуваат да се почитува територијалниот интегритет на Гренланд. Островот, кој бил данска колонија до 1953 година, останал дел од Кралството, а во 2009 година доби автономија што му овозможува самоуправување и одредување на внатрешната политика.