ФИФА ПРИМИ 5 МИЛИОНИ БАРАЊА ЗА БИЛЕТИ ЗА СВЕТСКОТО ПРВЕНСТВО – Навивачите гневни на високите цени

ФИФА објави дека во првите 24 часа од третата фаза на продажба за Светското првенство 2026 примила пет милиони барања за билети. Ова ја покажува „извонредната“ глобална побарувачка, иако навивачите критикуваат дека цените се високи, пренесува порталот Goal.

Барањата дојдоа од повеќе од 200 земји и територии, откако продажбата се отвори по ждрепката од минатата недела. Турнирот ќе се одржи во САД, Канада и Мексико од 11 јуни до 17 јули 2026 година и ќе биде прво Светско првенство со 48 национални тимови.

ФИФА не планира да ги менува цените, и покрај критиките од европските навивачки групи, кои ги нарекоа „изнудувачки“ и повикаа на прекин на продажбата додека не се ревидираат. За да го следат својот тим на целиот турнир, навивачите би морале да потрошат околу 7.000 долари.

Во првите 24 часа, најголема побарувачка имаше од домаќините САД, Канада и Мексико, а потоа следат Колумбија, Англија, Еквадор, Бразил, Аргентина, Шкотска, Германија, Австралија, Франција и Панама. Најмногу интерес предизвика натпреварот Колумбија – Португалија во Мајами на 27 јуни, со можен настап на Кристијано Роналдо.

Побарувачка има и за натпреварите: Бразил – Мароко (Њу Џерси), Мексико – Јужна Кореја (Гвадалахара), Еквадор – Германија (Њу Џерси) и Шкотска – Бразил (Мајами).