ВАРДАР 1961 ДОМИНАНТЕН ВО ЗАГРЕБ – Триумф и пласман во плејофот
Четвртата победа во пет натпревари ја потврдува доминацијата на македонскиот тим во групата.
Ракометарите на Вардар 1961 вечерва забележаа убедлив триумф на гостувањето кај хрватскиот Сесвете, победувајќи со 38-24 и веќе обезбедија пласман во плејофот, едно коло пред крајот на групната фаза во Европската лига на ЕХФ.
Црвено-црните“ до четвртата победа во петтото коло од групата Ф стигнаа со доминантна игра, наметнувајќи го својот квалитет уште од првиот свиреж. Веќе на полувреме резултатот беше убедлив 23-12, предност која Вардар рутински ја задржа до самиот крај во Загреб.
Најефикасни во македонскиот тим беа Урош Митровиќ со седум погодоци и Виктор Јанковски со шест, додека голманот Милош Валах блесна со 11 интервенции.
Со оваа победа, Вардар останува лидер во групата и сигурно се пласира меѓу првите две места кои водат во Топ 16. Во последното коло, на 2 декември во Скопје, вардарци ќе го пречекаат францускиот Тулуз.