ЗА ТАНГО СЕ ПОТРЕБНИ ДВАЈЦА Кремљ со порака до новите власти во Србија, Зеленски со честитка
Кремљ се надева на конструктивни односи со Белград и порачува дека „за танго се потребни двајца“, додека украинскиот претседател ја поздрави победата на Студентската листа и повика на поблиски односи со Европа.
По изборната победа на Студентската листа во Србија, од Москва и Киев пристигнаа различни пораки за идните односи со Белград. Кремљ очекува новите власти да ја продолжат соработката со Русија, додека украинскиот претседател Володимир Зеленски им честиташе на победниците и изрази надеж за поблиски односи на Србија со европската заедница.
Портпаролот на Кремљ, Дмитриј Песков, изјави дека Москва се надева оти новите српски власти ќе се залагаат за конструктивен развој на односите со Русија. Тој нагласи дека Москва е подготвена да продолжи да прави сè што е можно за унапредување на билатералните односи.
„За танго се потребни двајца“, порача Песков, посочувајќи дека Русија очекува и од Белград да покаже подготвеност за соработка.
Според него, односите со Москва се во интерес на Србија, а Кремљ се надева дека новата политичка сила што ќе ја преземе власта ќе придонесе за нивно натамошно развивање, објави РИА Новости.
Од друга страна, украинскиот претседател Володимир Зеленски ѝ честиташе на Студентската листа за победата, оценувајќи дека резултатот претставува ново поглавје во историјата на Србија.
„На Србија ѝ посакуваме успех, вистински развој и срдечни односи со европската заедница“, напиша Зеленски на социјалната мрежа X.
Тој ѝ се заблагодари на Србија за почитувањето на украинскиот народ, држава и независност, нагласувајќи дека Украина ги поздравува заедничките достигнувања што ги зајакнуваат општествата и им отвораат повеќе можности на граѓаните.
