ГОЛЕМ ПРЕСВРТ ВО ТРКАТА ЗА ГЕНЕРАЛЕН СЕКРЕТАР НА ОН – САД го предлагаат Виктор Орбан
Администрацијата на Доналд Трамп размислува да го поддржи поранешниот унгарски премиер за една од највисоките меѓународни функции, а според „Џерусалим пост“, Вашингтон верува дека зад неговата кандидатура би можеле да застанат и Русија и Кина.
Голем пресврт би можел да се случи во трката за нов генерален секретар на Обединетите нации. Администрацијата на американскиот претседател Доналд Трамп размислува да го предложи поранешниот унгарски премиер Виктор Орбан за функцијата, објави „Џерусалим пост“, повикувајќи се на извори од САД, Русија и Кина.
Според весникот, американски претставници наводно веќе му го претставиле предлогот на Орбан и го охрабриле да влезе во трката за челната позиција во ОН.
Поранешниот унгарски премиер, според истите извори, покажал интерес за идејата, но сè уште нема донесено конечна одлука дали ќе ја прифати понудата и ќе ја објави својата кандидатура.
Вашингтон, наводно, верува дека Орбан би можел да добие поддршка и од Русија и Кина, што би му ги зголемило шансите во процесот на избор на нов генерален секретар.
Сепак, Орбан наводно се двоуми да ја објави кандидатурата сè додека не добие доволно гаранции дека има реални шанси за победа.
Доколку информациите бидат потврдени и Орбан навистина влезе во трката, тоа би можело значително да ја промени дипломатската динамика околу изборот на наследникот на актуелниот генерален секретар на ОН. Засега, станува збор за медиумски извештај, а не за официјално потврдена кандидатура.
