ВОНРЕДНА ВЕСТ ОД ЛОНДОН Кир Стармер падна под притисок, Британија добива нов премиер

Британскиот премиер Кир Стармер објави дека се повлекува од функцијата претседател на Владата и лидер на Лабуристичката партија. Во емотивно обраќање пред резиденцијата на премиерот на Даунинг стрит број 10, Стармер потврди дека веќе го информирал кралот Чарлс III за својата одлука.

Тој побара од Националниот извршен комитет на Лабуристите итно да го започне процесот за избор на нов лидер. Според најавите, номинациите за наследник треба да започнат на 9 јули, со цел Велика Британија да добие нов премиер пред почетокот на есенската парламентарна сесија.

Стармер порача дека целосно ќе го поддржи својот наследник и дека ќе обезбеди мирен и уреден трансфер на власта.

„Тие ја наследуваат Британија која е посилна и поправедна отколку пред две години“, изјави Стармер.

Тој се заблагодари на своите соработници, членовите на партијата, персоналот во Даунинг стрит и државната служба.

На крајот од говорот, видно емотивен, Стармер зборуваше за животот по политиката и рече дека сака да се посвети на семејството.

„Сакам да бидам најдобриот сопруг што можам за мојата сопруга Вик, која беше моја поддршка во сите моменти, и најдобриот татко за моите деца, кои се моја гордост и радост“, рече тој.

Одлуката на Стармер доаѓа по зголемениот внатрепартиски притисок, кој дополнително се засили по успехот на неговиот долгогодишен политички ривал Енди Бернам.

Бернам, поранешен министер и актуелен градоначалник на Манчестер, неодамна освои значајна изборна победа, што му даде дополнителен политички импулс и можност да ја предизвика лидерската позиција во Лабуристичката партија.

По победата тој порача дека партијата се наоѓа на „последна шанса за промена“ и дека резултатот може да биде пресвртница за британската политика.

Иако Стармер претходно тврдеше дека нема намера да се повлече, притисокот од внатрешноста на партијата очигледно станал преголем.

Политичкиот подем на Енди Бернам дополнително привлече внимание поради неговата способност да се спротивстави на растечкото влијание на десничарската партија „Реформа на Обединетото Кралство“, предводена од Најџел Фараж.

Бернам убедливо победи во изборната единица Мејкерфилд со околу 55 проценти од гласовите, оставајќи го кандидатот на партијата на Фараж зад себе со разлика од повеќе илјади гласови.

Победата доби особено значење бидејќи дојде во област каде што „Реформ УК“ претходно успеваше да освои значајна поддршка.

Стармер му ја честиташе победата на Бернам, но предупреди дека Лабуристите мора да останат обединети и да избегнат период на политичка нестабилност.

За Енди Бернам ова би бил трет обид да стигне до челната позиција во Лабуристичката партија.

Во 2010 година, по оставката на Гордон Браун, тој се кандидираше за лидер, но загуби од Ед Милибанд.

Пет години подоцна повторно влезе во трката, но тогаш беше поразен од Џереми Корбин.

Неговите критичари често го обвинуваат дека ги менувал политичките ставови според расположението на јавноста. Како пример се наведува неговата позиција за Европската Унија – пред десет години беше поддржувач на останувањето на Велика Британија во ЕУ, додека денес зборува за можноста земјата повторно да се врати во европското семејство.

БРИТАНСКАТА ВЛАДА ВО РАСПАД – Премиерот Стармер под огромен притисок