УКРАИНСКИ УДАР ВРЗ КЛУЧНИ ЦЕЛИ Крим гори, Керчкиот мост повторно запрен

Серија силни експлозии го потресоа Крим во текот на ноќта, по што беа регистрирани повеќе пожари на стратешки локации. Керчкиот мост, клучната врска меѓу полуостровот и Русија, беше затворен за сообраќај повеќе од пет часа поради нападите, пренесува „Украинска правда“.

Според информации од каналите на Телеграм „Кримски ветер“, „Супернова+“ и изворите кои ја следат состојбата околу мостот, детонации биле слушнати во повеќе делови на полуостровот.

Најголемо внимание привлече пожарот во нафтениот терминал во Керч. Анализа на сателитски снимки, според „Кримски ветер“, покажала нови жаришта на објектот кој веќе беше погоден во претходен напад на 21 јуни.

Освен терминалот во Керч, пожари биле забележани и на други локации и на влезот во градот, во близина на Бакерово, каде што се наоѓаат позиции на руски системи за воздушна одбрана С-300 и С-400, како и кај пристаништето Кавказ и железничката станица Пивдена.

Каналот „Супернова+“ објави дека експлозиите се слушале низ целиот Крим, а подоцна соопшти дека бил погоден и комплексот за складирање и претовар на гориво „ТЕС Терминал“.

Руските власти на Крим засега немаат официјално објавено информации за причините за пожарите или за евентуалните штети.

Во меѓувреме, сообраќајот на Керчкиот мост беше прекинат на 22 јуни околу 23:24 часот. Ограничувањето траеше до раните утрински часови, а движењето беше нормализирано на 23 јуни во 5:10 часот.

Најновите случувања се надоврзуваат на серија напади врз руски позиции и инфраструктура во регионот. Украинскиот претседател Володимир Зеленски претходно потврди удари врз цели во Краснодарскиот крај и Керч.

Дополнителен проблем за руската администрација на Крим претставуваат и нарушувањата во снабдувањето. Властите воведоа ограничувања за продажба на гориво, а во делови од полуостровот се применуваат и распоредни прекини на електричната енергија поради проблеми со снабдувањето.