СКОПЈЕ ОБЕЛЕЖУВА 82 ГОДИНИ ОД ОСЛОБОДУВАЊЕТО ОД ФАШИЗМОТ Три дена жестоки улични борби за слободата на градот

Скопје денеска одбележува 82 години од ослободувањето од фашистичката окупација, на 13 ноември 1944 година, по неколкудневни жестоки борби на единиците на Народноослободителната војска и партизанските одреди на Македонија.

Ослободувањето го извеле 42. и 50. Народноослободителна дивизија и 16. Македонска бригада, кои настапувале од повеќе правци, со поддршка на локалните ударни групи. Борбите започнале на 12 ноември и се воделе на повеќе локации низ градот, вклучително кај Главната пошта, Народната банка, железничката станица и мостовите на Вардар.

Германските сили давале силен отпор, но под притисок на партизанските единици постепено се повлекувале. Особено значајна била одбраната на Камениот мост и другите мостови на Вардар, кои окупаторските сили планирале да ги минираат. Била спасена и хидроцентралата „Матка“ од уништување.

На 13 ноември германскиот отпор бил скршен, а градот бил ослободен. Во борбите загинале повеќе од 420 борци, додека за време на Втората светска војна животот го загубиле и околу 4.600 жители на Скопје.

По повод годишнината, денеска ќе биде положено цвеќе на спомен-обележјата на ослободителите на Скопје, на Партизанските гробишта во Бутел и на гробот на генералот Михајло Апостолски. Вечерва во Македонската опера и балет ќе се одржи и свеченото доделување на наградата „13 Ноември“.