ШТО СЕ СЛУЧУВА СО ВРХОВНИОТ ЛИДЕР НА ИРАН Калибаф тврди дека Моџтаба Хамнеи е во добра здравствена состојба
Претседателот на иранскиот парламент изјави дека врховниот лидер има „силен, весел и оптимистички дух“.
Претседателот на иранскиот парламент, Мохамед Бакер Калибаф, денеска изјави дека врховниот лидер на Иран, Моџтаба Хамнеи, е во добра здравствена состојба и покрај актуелните предизвици со кои се соочува земјата.
„Тој има силен, весел и оптимистички дух“, рече Калибаф пред почетокот на парламентарната седница, пренесува иранската новинска агенција Тасним.
Калибаф истакна дека бил особено импресиониран од непоколебливоста на Хамнеи, неговиот душевен мир и познавањето на прашањата што биле предмет на разговорите.
Меѓу главните теми на разговорите биле економските предизвици, следењето на макроекономските показатели, зачувувањето на производствените синџири и обезбедувањето суровини и основни производи. Посебно внимание, според Калибаф, било посветено и на зачувувањето на куповната моќ на населението, како и на животниот стандард на припадниците на вооружените сили и борците на терен.
На состанокот биле разгледани и воените случувања, состојбата на фронтот, таканаречениот фронт на отпорот, дипломатските активности, преговорите и поморската блокада.
Според изјавата на Калибаф, врховниот лидер ја нагласил потребата од продолжување на услугите за граѓаните, зајакнување на отпорноста на општеството и зачувување на единството меѓу државните институции.
Посебно било истакнато значењето на координацијата меѓу раководителите на различните гранки на власта и доследното спроведување на директивите на врховниот лидер. Меѓу темите на разговорите биле и односите со стратешките партнери, особено Кина, како и координацијата меѓу владата и парламентот.
Калибаф оценил дека единството во изјавите и постапките, институционалната координација и спроведувањето на утврдените насоки се клучни за надминување на предизвиците со кои се соочува Иран.
