ШОКАНТНО ОТКРИТИЕ Американските разузнавачи не ѝ верувале на Израел дека Иран сака да го убие Трамп
Американски функционери за „Вашингтон пост“ тврдат дека ЦИА била скептична кон разузнавањето за наводен ирански план за атентат врз Трамп.
„Вашингтон пост“ ексклузивно објави дека американските разузнавачки служби изразиле сомнеж во веродостојноста на информациите за наводна иранска закана за атентат врз американскиот претседател Доналд Трамп. Според сегашни и поранешни американски функционери запознаени со разузнавачките информации, заканата до Вашингтон била пренесена од Израел.
Според еден од функционерите, информацијата била доставена до Централната разузнавачка агенција (ЦИА), каде што аналитичарите не ја оцениле како доволно убедлива. Нивниот скептицизам, наводно, бил пренесен и до претставници на администрацијата на Трамп.
Друг американски функционер за „Вашингтон пост“ изјавил дека извештаите за закани врз животот на претседателот биле „израелски, а не американски“ и дека ги смета за „малку веродостојни“. Овие сомнежи фрлаат ново светло врз одлуката од 8 јули во Анкара, по самитот на НАТО, кога Трамп бил префрлен од претседателскиот „Ер Форс Уан“ во воен авион со камион за храна. Според весникот, и покрај сомнежите во дел од разузнавачките кругови, Белата куќа и Тајната служба очигледно процениле дека ризикот не смее да се преземе.
Трамп претходно изјави дека бил и понатаму е изложен на поголем ризик од повеќето негови министри и соработници, како и од новинарите кои останале во претседателскиот авион. Според него, авионот и луѓето во него служеле како мамка во случај Иран да се обиде да го нападне. Претседателот во вториот авион патувал само со секретарката Натали Харп и двајца негови долгогодишни соработници.
Белата куќа не одговорила директно на прашањата на „Вашингтон пост“ за разузнавачките информации добиени од САД и за тоа како американските власти ја процениле нивната веродостојност. Неименуван американски функционер изјавил дека Трамп се соочил со бројни закани по животот, вклучително и од Иран, поради што биле преземени сите неопходни мерки за негова заштита. Тој додал дека главната задача на Тајната служба е безбедноста на претседателот и дека таа задача била исполнета.
ЦИА одбила да ги коментира наодите на весникот, додека израелската амбасада во Вашингтон не одговорила веднаш на прашањата на „Вашингтон пост“.
ТРАМП ВО ПОСЛЕДЕН МОМЕНТ СМЕНИЛ АВИОН Тајната служба стравувала од можен ирански напад
