РОБЕРТО КАРЛОС ГО ИЗГУБИ РЕЧИСИ ЦЕЛО БОГАТСТВО Исчезнаа 99 отсто од парите што ги заработив
Легендарниот Бразилец откри како лошите одлуки, проблемите со менаџерите и семејството го оставиле без огромното богатство.
Поранешниот бразилски репрезентативец и легенда на Реал Мадрид, Роберто Карлос, откри дека по завршувањето на фудбалската кариера направил низа лоши одлуки поради кои речиси целосно го изгубил богатството што го стекнал како професионален фудбалер.
На панел-дискусија, легендарниот лев бек искрено зборуваше за финансиските проблеми со кои се соочил, посочувајќи дека од неговата огромна заработка практично не останало ништо.
„Сè што заработив како играч ме остави практично без ништо на сметката. Мислев дека ќе станам тренер бидејќи работев со некои од најдобрите тренери во светот. Сакав да почнам во мал клуб, а потоа станав спортски директор и фитнес тренер. Имав проблеми со менаџерите и семејството. Изгубив сè што имав. Изгубив 99 проценти од мојата заработка. Но, успеав да си го вратам животот во првобитната состојба“, изјави Роберто Карлос.
Роберто Карлос се смета за еден од најдобрите леви бекови во историјата на фудбалот. Професионалната кариера ја започна во Палмеирас, а потоа премина во Интер.
Најголемиот дел од својата кариера го помина во Реал Мадрид, каде што настапуваше цели 11 години и освои три титули во Лигата на шампионите.
Бразилецот беше препознатлив по неверојатната брзина, силниот удар и спектакуларните голови од слободен удар, а неговиот шут од далечина остана еден од најпрепознатливите во фудбалот.
За репрезентацијата на Бразил одигра повеќе од 120 натпревари и го освои Светското првенство во 2002 година. Претходно настапи и на Мундијалот во 1998 година, кога Бразил стигна до финалето, како и на Светското првенство во 2006 година.
По завршувањето на играчката кариера, Роберто Карлос се обиде да се реализира како тренер. Работеше во турските клубови Сиваспор и Акхисарспор, како и во индискиот Делхи Дајнамос, каде што имаше и улога на играч-тренер.
Подоцна се врати во Реал Мадрид, каде што извршуваше различни функции, меѓу кои и амбасадорски и менаџерски улоги.
И покрај огромните финансиски загуби, Роберто Карлос вели дека успеал да го стабилизира својот живот и повторно да застане на нозе.
