РЕАЛ МАДРИД ПОДГОТВУВА ТРАНСФЕР ОД 80 МИЛИОНИ ЕВРА А Валверде добива клаузула од милијарда

„Кралевите“ сакаат да го вратат Нико Паз од Комо, Куртоа останува до 2028 година, а Валверде ќе потпише договор до 2031 година.

РЕАЛ МАДРИД ПОДГОТВУВА ТРАНСФЕР ОД 80 МИЛИОНИ ЕВРА А Валверде добива клаузула од милијарда
Фото: Принтскрин

Реал Мадрид подготвува сериозни промени во играчкиот кадар, со цел да ги задржи клучните фудбалери и да го врати еден од најголемите млади таленти што ги разви во последните години. Во центарот на вниманието е аргентинскиот офанзивец Нико Паз, кој со одличните настапи во италијански Комо го привлече вниманието на раководството на мадридскиот гигант. Според информациите, Реал планира следното лето да ја активира договорената клаузула за негово враќање, вредна 80 милиони евра.

Паз минатото лето имал можност да остане во Мадрид, но инсистирал да продолжи со развојот во Комо под водство на Сеск Фабрегас. Италијанскиот клуб претходно, во 2024 година, плати шест милиони евра за неговиот трансфер, а подоцна се договори со Реал за откуп на преостанатите 50 проценти од неговите права за 60 милиони евра. И покрај тоа што Реал повеќе нема сопственички удел во неговиот договор, го задржал правото да го врати во своите редови за 80 милиони евра следното лето.

Дваесетгодишниот Аргентинец игра во извонредна форма. Минатата сезона постигна 12 гола во Серија А, а во актуелната сезона веќе има шест погодоци и осум асистенции на 14 официјални натпревари. Особено импресивни се неговите настапи во Лигата на шампионите, каде што на четири натпревари запиша три гола и пет асистенции.

Неговите игри му донесоа и сè поголема доверба во аргентинската репрезентација на селекторот Лионел Скалони. На последниот настап, на 17 ноември, Паз постигна два гола во убедливата победа од 7:0 против Костарика, со што неговиот репрезентативен биланс достигна шест погодоци. Раководството на Реал верува дека Аргентинецот може да има значајна улога во иднината на клубот и сериозно размислува да ја искористи можноста за негово враќање.

Паралелно со плановите за нови засилувања, Реал Мадрид ја осигури и иднината на еден од своите најважни играчи. Клубот и белгискиот голман Тибо Куртоа постигнале договор за продолжување на соработката до 30 јуни 2028 година. Куртоа пристигна во Мадрид во 2018 година и досега одигра 348 натпревари за „кралскиот клуб“, освојувајќи 14 трофеи, меѓу кои две титули во Лигата на шампионите, три во Ла Лига и една во Купот на кралот.

Белгискиот репрезентативец има одиграно 115 натпревари за националниот тим, а во кариерата ги освои и најзначајните индивидуални признанија за еден голман. Меѓу нив се Златната ракавица на Светското првенство во Русија во 2018 година, наградата за најдобар голман на ФИФА истата година, трофејот „Јашин“ во 2022 година и две признанија за член на Светската единаесетка на ФИФА. Особено се памети неговиот настап во финалето на Лигата на шампионите во Париз во 2022 година, кога со серија фантастични интервенции му помогна на Реал да стигне до 14-тата европска титула.

Уште еден голем потег на Реал е продолжувањето на договорот со уругвајскиот репрезентативец Федерико Валверде. Според шпанскиот весник „АС“, мадридскиот клуб постигнал договор со фудбалерот за продолжување на соработката до 2031 година. Неговиот актуелен договор истекува во 2029 година, па новиот ќе ја продолжи соработката за дополнителни две сезони.

Валверде ќе добие и значително зголемување на платата, со што ќе се најде меѓу најплатените фудбалери во тимот. Според информациите на „Атлетик“, во новиот договор ќе биде вметната и откупна клаузула од неверојатна една милијарда евра. Уругваецот пристигна во Реал во 2016 година од Пењарол, како 18-годишен талент, а со текот на годините се наметна како еден од најважните фудбалери и лидери на екипата.

Досега има одиграно 387 натпревари за мадридскиот клуб, постигнато 44 гола и освоено 14 трофеи. Официјалната потврда за продолжувањето на договорот сè уште се очекува.

CATEGORIES
Share This