РАКЕТЕН ПЕКОЛ НАД КИЕВ 40 балистички ракети ја погодија Украина, Зеленски алармира

Руските сили рано во неделата, 19 јули, извршија еден од најмасовните балистички напади врз Киев од почетокот на целосната инвазија врз Украина. Според извештаи на извори кои ја следат воената активност, кон украинската престолнина биле истрелани околу 40 балистички ракети во период од приближно 40 минути.

Во нападот биле употребени ракети од типот „Искандер-М“, „Циркон“ и С-400, што според украинските извори претставува најголем број балистички ракети употребени во еден напад врз Киев досега.

Последиците од нападот биле почувствувани во повеќе делови од градот. Поради директни удари и пад на остатоци од соборени проектили биле оштетени објекти во пет киевски области – Десњанска, Днепровска, Шевченковска, Свјатошинска и Соломјанска. Оштетена е и површинската инфраструктура на метро станицата „Лукјанивска“, каде што екипи работат на поправка на ескалаторите и системите за управување со патничкиот сообраќај.

Во областа Буча, според локалните власти, биле погодени магацински и логистички објекти. Во нападите две лица биле повредени – едно лице со повреди од шрапнели било пренесено во болница, додека друго добило медицинска помош на местото на настанот. Нападот врз Киев уследи по серија руски удари врз различни делови од Украина.

Во Херсон, руски дрон погодил станбена зграда во областа Корабел, при што биле повредени пет лица, меѓу кои и две деца. Во Криви Рог, руски напад врз инфраструктурен објект предизвикал пожар и смрт на еден цивил. Руските сили продолжија со напади и врз Одеса и нејзината пристанишна инфраструктура. Во еден од ударите бил погоден трговски брод под знамето на Антигва и Барбуда, при што едно лице загинало, а тројца членови на екипажот биле повредени. За време на интервенцијата на спасувачките екипи, следел нов напад во кој била оштетена специјализирана опрема за гасење пожари и спасување.

Претходно, ракетен напад врз пристаништето во Одеса оштетил и цивилен брод под знамето на Маршалските Острови, при што четворица членови на екипажот биле повредени. По најновиот напад врз Киев, украинскиот претседател Володимир Зеленски порача дека заштитата од балистички ракети останува најголем приоритет за Украина.

„Потребни ни се пресретнувачи секој ден. Тие системи буквално спасуваат животи за време на секој голем руски напад“, напиша Зеленски.

Тој се повикува на продолжување на воената помош и зголемен притисок врз Москва преку санкции. Украинските сили, пак, во текот на ноќта меѓу 18 и 19 јули извршија напади врз неколку воени и енергетски цели на територијата на Русија и во окупираните области. Според извештаите од воени извори, украински дронови погодиле складиште за нафта во Михајловск, во Ставрополскиот регион на Русија. Тоа бил трет пријавен напад врз истиот објект во последните недели.

Експлозии биле пријавени и во окупираниот Луганск, каде жителите сведочеле за силни детонации во текот на ноќта. Во окупираниот Крим, украински беспилотни летала погодиле повеќе цели. Според извештаи од различни извори, по нападите избувнал пожар во трафостаница во Јалта, што предизвикало прекин на електричната енергија во делови од градот.

Експлозии биле регистрирани и во областа Керч, по што привремено бил затворен Кримскиот мост што го поврзува полуостровот со Русија. Украински извори наведуваат дека бил погоден и енергетски објект во близина на Судак, како дел од серијата напади врз цели на окупираниот Крим.