ПУТИН ЈА ИЗРЕВОЛТИРА ЈАПОНИЈА Токио испрати протест до Москва, се подготвуваат и нови мерки

Посетата на рускиот претседател Владимир Путин на островот Еторофу, еден од четирите јужни Курилски Острови кои Јапонија ги смета за свои, предизвика остри реакции во Токио. Јапонската влада веќе испрати протестна нота до Москва, а се разгледуваат и дополнителни мерки, меѓу кои и заострување на санкциите кон Русија.

Јапонскиот премиер Санае Такаичи ја оцени посетата како „апсолутно неприфатлива“, нагласувајќи дека Токио ги смета четирите острови за „вродена територија на Јапонија“, врз основа на историските факти и меѓународното право.

Според Такаичи, потегот на Путин е спротивен на доследниот став на јапонската влада кон таканаречените Северни територии и ги повредил чувствата на јапонскиот народ. Таа предупреди и дека посетата дополнително ги отежнува напорите за подобрување на односите меѓу двете земји.

По изјавата на премиерката, јапонскиот министер за надворешни работи Тошимицу Мотеги го повикал рускиот амбасадор во Токио, Николај Ноздрев, во Министерството за надворешни работи и официјално му ја врачил протестната нота.

Мотеги оценил дека едностраната посета има „исклучително негативно влијание“ врз билатералните односи и побарал ставот на јапонската влада веднаш да биде пренесен до Москва.

Спорот околу четирите острови трае со децении. Јапонија тврди дека Советскиот Сојуз ги окупирал островите по Втората светска војна, додека Русија ги смета за дел од својата територија.

Односите меѓу Москва и Токио дополнително се влошија по почетокот на војната во Украина. Во 2022 година Русија ги прекина преговорите со Јапонија за мировен договор, откако Токио воведе санкции кон Москва.

И покрај затегнатите односи, двете страни досега одржуваа одредени дипломатски канали за комуникација. Мотеги неодамна накратко разговарал со рускиот министер за надворешни работи Сергеј Лавров на Филипините.

Сепак, аналитичарите предупредуваат дека посетата на Путин на Еторофу може дополнително да ги продлабочи несогласувањата и да ги влоши и онака нарушените односи меѓу Токио и Москва.