ЏЕКО СЕ ПРОСТИ ОД БОСНА Репрезентацијата е дел од мене и ќе биде засекогаш

Един Џеко синоќа за последен пат го облече дресот на репрезентацијата на Босна и Херцеговина. „Дијамантот“  се прости од националниот тим на натпреварот против Шведска во Зеница, каде што целата вечер беше посветена на еден од најголемите фудбалери во историјата на босанскиот фудбал.

Атмосферата во БиХ веќе со денови беше наелектризирана. Навивачите му се заблагодаруваат на својот миленик за годините поминати во националниот дрес и за историските моменти што ги донесе. Џеко беше еден од клучните играчи на двете учества на Босна и Херцеговина на Светското првенство – во Бразил во 2014 година, како и на Мундијалот во Северна Америка.

Зеница му приреди посебно збогување, а натпреварот против Шведска беше последната страница од неговата репрезентативна кариера.

Фудбалот во Босна и Херцеговина засекогаш ќе го памети 2 октомври 2026 година. Денот кога една од најголемите фудбалски приказни во историјата на земјата дојде до својот крај.

Во ремито против Шведска, 40-годишниот Един Џеко последен пат го облече дресот на репрезентацијата на Босна и Херцеговина. По натпреварот, легендарниот напаѓач емотивно зборуваше за своето збогување со националниот тим.

„Емоциите ми се измешани. Беше многу емотивно во последните неколку дена, откако ја донесов одлуката. Како што се приближуваше натпреварот, стануваше сè поемотивно. Но, си заминувам среќен затоа што знам дека дадов сè од себе“, рече Џеко.

Тој порача дека репрезентацијата ја остава во добри раце и со генерација која има квалитет и желба да ја претставува Босна и Херцеговина.

„Го оставам тимот во добра форма, со многу квалитетни и добри момци кои ја сакаат Босна и Херцеговина. Иако повеќе нема да играм, мојата врска со репрезентацијата останува засекогаш. Репрезентацијата е дел од мене и јас сум дел од неа засекогаш“, додаде капитенот.

Џеко откри и кој момент му бил најтежок во целата вечер.

„Кога тргнав кон моето семејство и ги видов децата како плачат. Се воздржав“, раскажа тој.

Иако неговото збогување отвора прашање кој ќе ја преземе улогата што со години ја имаше Џеко, тој самиот не смета дека некој треба да го „замени“.

„Не ми треба никој да ме менува. Сите тие момци имаат свои имиња и презимиња и се докажаа во последните две години. Отидовме на Светското првенство и тоа секако е поттик за овој тим.“

Џеко посочи дека респектот кон босанската репрезентација веќе се чувствува и кај противниците.

„Можете да видите дека другите тимови имаат голема почит кон оваа група момци“, заклучи Џеко.

По повеќе од една деценија, капитенот го кажа последното збогум. Но, како што самиот порача, неговата врска со репрезентацијата нема никогаш да заврши.

Gurad of honor for Edin Dzeko from his teammates when he got substituted. pic.twitter.com/c9ZrZMDXnB

— Bosnian Football (@BosniaNTBall) October 2, 2026