ПОД АЛПИТЕ СЕ ГРАДИ ЧУДО – Џиновска машина „Катрин“ ја пробива планината

Длабоко под снежните врвови на Алпите, далеку од јавноста, се одвива еден од најамбициозните инфраструктурни проекти во Европа, изградбата на железничкиот тунел Бренер. Огромни машини со должина од фудбалски терен ден и ноќ пробиваат низ планинскиот масив, создавајќи нова транспортна артерија што ќе го поврзе северот и југот на континентот.

Во тиролското село Штајнах ам Бренер се наоѓа едно од најголемите градилишта во Европа. Тука се гради железничкиот тунел кој ќе ја поврзе Австрија со Италија и ќе стане дел од стратешкиот коридор што се протега од Скандинавија до Медитеранот.

Проектот неодамна влезе во нова фаза со активирањето на огромната машина за тунелирање „Катрин“ на јужниот дел од трасата. Оваа машина, долга 144 метри, има глава за дупчење со ширина од речиси 10 метри и е специјално дизајнирана за тешките алпски карпи.

„Катрин“ може да работи во различни режими зависно од структурата на планината, а инженерите предупредуваат дека најсложениот дел од изградбата допрва следува.

Со завршувањето, системот на тунели ќе достигне должина од околу 64 километри, што ќе го направи Бренер еден од најдолгите железнички подземни премини во светот.

Главната цел е да се забрза транспортот, да се зголеми користењето на железницата за товар и да се намали бројот на камиони на алпските патишта.

Европските институции го гледаат проектот како клучен чекор во намалување на сообраќајниот метеж и загадувањето. Планот е значителен дел од товарниот сообраќај да се префрли од патиштата на железницата, со што би се намалиле и емисиите на јаглерод диоксид на една од најфреквентните рути во Европа.

Бренерскиот тунел не е само инженерски проект, туку и симбол на европска соработка. Во неговата изградба учествуваат компании и инженери од 11 земји.

Клучна улога има германската компанија „Херенкнехт“, светски лидер во производство на машини за тунелирање. Нивните машини испорачуваат над 6.000 коњски сили и се користат на глобални мегапроекти, од Панамскиот канал до Хималаите.

Основачот на компанијата, инженерот Мартин Херенкнехт, предупредува дека Европа мора поостро да ја штити својата индустрија од конкуренцијата од Кина, посочувајќи ги пониските цени на челикот и работната сила.

Тој изјави дека без посилни економски мерки Европа ризикува да ја изгуби конкурентноста на глобалниот пазар.

Додека машините продолжуваат да копаат километар по километар низ Алпите, тунелот Бренер веќе се смета за еден од најзначајните европски инфраструктурни проекти. Тој има потенцијал трајно да го промени начинот на движење на луѓе и стоки низ континентот и да ја редефинира европската транспортна мрежа.