ПО ОБВИНЕНИЈАТА ЗА КОКАИН, НОВ УДАР ВРЗ МАДУРО Сега го товарат и за тортура
Соборениот венецуелски претседател и неговата сопруга Силија Флорес се соочуваат со нови обвиненија за наводно користење тортура, произволни притворања и насилство против политичките противници.
Американските власти денеска поднесоа изменето обвинение против соборениот венецуелски претседател Николас Мадуро, кој се наоѓа во затвор во Њујорк, обвинувајќи го дека учествувал во заговор за тортура врз граѓани со цел да ја задржи власта.
Мадуро претходно беше обвинет за учество во заговор за шверц на кокаин во Соединетите Американски Држави. Со новото обвинение, тој се соочува и со дополнителни обвинувања поврзани со кршење на човековите права за време на неговото претседателствување, објави Асошиејтед прес (АП).
Според изменетото обвинение, Мадуро наводно одобрил употреба на тортура врз одредени лица и надгледувал систем во кој тортурата, произволните притворања и насилството биле користени за задушување на политичката опозиција.
Во обвинението се опфатени и Мадуро и неговата сопруга, Силија Флорес, кои се товарат за заговор за извршување тортура.
