ПЛАЌАЛЕ ЗА ОПЕРАЦИЈА, А ФОНДОТ ВЕЌЕ ЈА ПЛАТИЛ – МВР откри сомнежи за масовна злоупотреба

Голема финансиска злоупотреба во здравствениот сектор, во која наводно биле оштетени илјадници пациенти и државниот буџет, е предмет на истрага на Министерството за внатрешни работи. Според досегашните сознанија, пациентите плаќале за операции на очи кои претходно веќе биле фактурирани и наплатени од Фондот за здравствено осигурување.

Министерот за здравство Сашо Клековски откри детали за случајот, во кој, според сомнежите на истражните органи, здравствена установа наплатувала исти услуги од две страни – од Фондот и од самите пациенти.

Според пријавата, на пациентите, покрај законската партиципација, им била наплаќана и приватна цена за операциите, без да им биде соопштено дека истите услуги се наплатуваат и од Фондот за здравствено осигурување.

Според најновите информации од МВР, штетата врз државниот буџет изнесува околу 1,7 милиони евра, по основ на исплати врз основа на фиктивни фактури. Дополнително, се евидентирани и 525.000 денари за ненаплатени договорни казни.

Истражните органи се сомневаат дека во периодот од 2022 до 2025 година здравствената установа се стекнала со противправна имотна корист од околу 4,25 милиони евра.

Овие износи се дел од наводите во истрагата, а евентуалната кривична одговорност на пријавените лица треба да се утврди во соодветна постапка. Според кривичната пријава, во случајот се оштетени меѓу 3.000 и 4.000 пациенти.

Сомнежите се однесуваат на договор склучен во 2020 година меѓу двајца тогашни директори на Фондот за здравствено осигурување и претставник на приватната здравствена установа. Според МВР, договорот бил склучен спротивно на пропишаните постапки и интерните акти на Фондот. Неправилности се истражуваат и во постапката за негово одобрување од страна на претседателот на Управниот одбор.

Врз основа на договорот, наводно биле внесувани невистинити податоци во електронскиот систем на Фондот и изготвувани фактури со невистинита содржина, со што се овозможувала наплата на истите здравствени услуги од повеќе извори.

Одделот за сузбивање на организиран и сериозен криминал при МВР поднел кривична пријава до Основното јавно обвинителство за гонење организиран криминал и корупција против 11 физички лица и едно правно лице.

Пријавата опфаќа сомнежи за повеќе кривични дела:

• злоупотреба на службената положба и овластување;

• несовесно работење во службата;

• фалсификување или уништување деловни книги;

• измама во службата;

• перење пари и други приноси од казниво дело.

Според информациите од МВР, во акцијата биле лишени од слобода осум лица.

Меѓу лицата опфатени со истрагата е и поранешниот директор на Фондот за здравствено осигурување Ден Дончев, кој во пријавата се споменува како првопријавен. Случајот опфаќа и поранешни и сегашни вработени во Фондот, како и раководни лица во приватната очна клиника „Санте Плус“.

Во истрагата биле вклучени и други надлежни институции, меѓу кои Државниот санитарен и здравствен инспекторат и Агенцијата за лекови. Надлежните органи треба да ги утврдат сите околности на случајот, начинот на кој биле склучени и спроведувани договорите, како и евентуалната одговорност на инволвираните лица.