ОД ДЕНЕСКА Личната карта и возачката дозвола и на мобилен телефон
Промовирана апликацијата „м.Услуги“, која овозможува дигитален идентитет, електронски документи и пристап до јавни услуги преку мобилен телефон.
Министерството за дигитална трансформација ја промовираше мобилната апликација „м.Услуги“ (m.Uslugi), преку која граѓаните ќе можат да ги користат своите електронски документи, меѓу кои личната карта и возачката дозвола, и да пристапуваат до дигитални јавни услуги.
Апликацијата е бесплатна и нејзиното користење е доброволно. Таа претставува дополнителен начин за пристап до услугите на институциите, без укинување на досегашните можности за комуникација со нив.
Министерот за дигитална трансформација Стефан Андоновски при презентацијата ја активираше апликацијата и ја додаде својата електронска лична карта во дигиталниот паричник.
Тој посочи дека станува збор за електронска верзија на документот, а не за фотографија или ПДФ-датотека. Апликацијата овозможува и селективно споделување лични податоци, односно граѓаните да ја потврдат потребната информација, како полнолетството, без да ги откриваат останатите лични податоци.
Во следните фази се планира и интегрирање можности за плаќање. Според Андоновски, целта е административните постапки да се поедностават, а јавните услуги да станат подостапни за граѓаните.
Идејата за „м.Услуги“ започнала во 2024 година, по запознавањето со украинскиот модел „Дија“, а концептот е развиен во рамките на европскиот проект „GovTech4All“, преку програмата „Digital Europe“.
