НОВА ДИГИТАЛНА АЛАТКА ОД УСТАВНИОТ СУД „Дознај ФАКТИ“ ќе ги разоткрива сите дилеми

Уставниот суд од денеска ја пушта во употреба новата комуникациска платформа „Дознај ФАКТИ од Уставен суд“, наменета за навремено, точно и официјално информирање на граѓаните, медиумите и пошироката јавност.

Од Судот информираат дека платформата е дел од нивните заложби за поголема транспарентност, отвореност и достапност на информации од јавен интерес. Нејзината цел е да обезбеди проверени факти и појаснувања за работата на Судот, неговите постапки, одлуки и надлежности, како и да помогне во спречувањето на дезинформации, шпекулации и лажни вести поврзани со уставно-судската работа.

Преку платформата, јавноста ќе може да добива официјални информации, објаснувања за донесените одлуки и тековните постапки, како и поедноставени толкувања на уставно-правни прашања. Дополнително, ќе бидат објавувани податоци за организацијата и надлежностите на Судот, значајни одлуки од неговата практика и содржини поврзани со историјата и развојот на уставното судство.

Од Уставниот суд оценуваат дека „Дознај ФАКТИ“ ќе има и едукативна улога, придонесувајќи за подобро разбирање на уставно-правниот систем и улогата на Судот во заштитата на уставноста, законитоста и човековите права и слободи.

„Со воспоставувањето на оваа платформа, Уставниот суд ја потврдува својата определба за навремена, точна и одговорна комуникација со јавноста и за градење доверба преку факти и официјални информации“, наведуваат од Судот.

Платформата ќе функционира под мотото: „Кога имаш дилеми – провери ги фактите! Точно. Јасно. Официјално.“.