НА МАРС ЌЕ СЕ ГРАДИ СО КВАСЕЦ Научниците открија „жив“ материјал за идните колонии
Научниците развија евтин и енергетски ефикасен материјал што може да се печати со 3Д-технологија – наместо скапи пратки од Земјата, идните колонизатори би можеле да градат директно на Црвената Планета.
Идните жители на Марс можеби нема да мора да чекаат огромни количества градежен материјал да бидат испратени од Земјата. Научници од Универзитетот за наука и технологија во Хонг Конг (HKUST) развија необичен „жив“ градежен материјал кој би можел да се користи за изградба на живеалишта директно на Марс.
Материјалот комбинира генетски модифициран квасец, желатин и реголит – почвата и ситниот материјал што ја покрива површината на Марс – а неговата голема предност е што може да се обликува со 3Д-печатење.
Според SCMP, истражувањето на научниците од Хонг Конг, објавено во онлајн изданието на списанието Chem Circularity, опишува биолошко врзивно средство кое ги поврзува грануларните материјали и создава компактна и цврста структура.
ЦВРСТИНА ОД ОКОЛУ 12 МЕГАПАСКАЛИ
Оптимизираната мешавина достигнала цврстина на притисок од околу 12 мегапаскали (MPa), што е приближно 170 отсто повеќе од контролната мешавина и ја става во опсегот на цврстина карактеристичен за конвенционални градежни материјали.
Една од најинтересните карактеристики е начинот на кој материјалот се стврднува. Наместо класичен процес кој бара печки и високи температури, мешавината би можела да користи природните услови на Марс.
МАРСОВСКАТА СТУДЕНА АТМОСФЕРА СТАНУВА „ПЕЧКА“
По 3Д-печатењето, екстремно студената и сува атмосфера на Марс овозможува материјалот природно да се суши преку замрзнување.
Во процесот, квасецот функционира како биолошко лепило, поврзувајќи ги честичките и создавајќи лесна, но цврста структура. Според резултатите од истражувањето, добиениот материјал покажува издржливост споредлива со полесните градежни материјали.
Најголемата предност е енергетската ефикасност. Нема потреба од печки со висока температура, што би можело значително да ја намали енергијата потребна за изградба на идните марсовски населби.
ОД МАЛИ ПРОБНИ СТРУКТУРИ ДО ИДНИ МАРСОВСКИ КОЛОНИИ
Досега научниците успешно испечатиле само мали пробни структури, па технологијата е далеку од изградба на целосни живеалишта на Марс.
Сепак, концептот отвора сосема нова можност: градежниот материјал да се произведува и обликува со ресурси достапни на самата планета, наместо огромни количини материјали да се транспортираат од Земјата.
Доколку технологијата се покаже доволно издржлива и практична за поголеми конструкции, идните марсовски колонии би можеле да се градат со комбинација од локален реголит и биолошки материјали – што би било уште еден чекор кон создавање трајни човечки населби надвор од Земјата.
