АРСОВСКА УДРИ ПО ГАНИУ Ме тужи затоа што го нареков криминалец, а што е со 150 спорни легализации?!

Поранешната градоначалничка на Скопје тврди дека Висар Ганиу поднел тужба за клевета против неа, но наместо извинување, таа повторно отвори сериозни прашања за 150 спорни легализации, меѓу кои и зграда вредна пет милиони евра.

АРСОВСКА УДРИ ПО ГАНИУ Ме тужи затоа што го нареков криминалец, а што е со 150 спорни легализации?!
Фото: Принтскрин

Поранешната градоначалничка на Град Скопје, Данела Арсовска, преку објава на социјалните мрежи тврди дека поранешниот градоначалник на Општина Чаир, Висар Ганиу, поднел тужба за клевета против неа, бидејќи јавно го нарекла криминалец.

Арсовска реагира дека наместо да бара отштета за наводна душевна болка, Ганиу треба да даде одговори за нејзините обвинувања за 150 спорни легализации, за кои тврди дека располага со обемна документација.

Како особено спорен пример Арсовска ја посочува зграда чија вредност ја проценува на пет милиони евра. Таа тврди дека постојат сериозни несогласувања меѓу датумите на изградбата, основањето на фирмата и купувањето на земјиштето.

Според нејзините наводи, објектот бил легализиран како да е изграден во 2010 година, иако таа тврди дека располага со документација и снимки кои покажуваат дека зградата се градела во 2025 година. Дополнително, Арсовска посочува дека фирмата поврзана со изградбата била основана во 2020 година, додека земјиштето било купено во 2021 година.

„Како оваа зграда што ја документиравме дека се гради во 2025 година ја легализирал како да е градена во 2010?“, прашува Арсовска.

Таа саркастично забележува дека во случајот треба да се објасни и како 15-годишник успеал да изгради зграда вредна пет милиони евра, на 12 ката.

Поранешната градоначалничка тврди дека за своите обвинувања располага со 3.200 страници докази и упати остри критики кон Јавното обвинителство, обвинувајќи го дека со години не постапува по случајот.

„Висар Вики Ганиу ми поднел тужба за клевета бидејќи добил душевна болка, затоа што сум го нарекла криминалец. Само прво треба да одговори за 150 фалсификат легализации, меѓу кои зграда вредна 5 милиони евра“, напиша Арсовска.

Таа додава дека нејзините обвинувања се поткрепени со официјална документација и дека очекува институциите да дадат одговори.

Во истата објава, Арсовска изнесе и сериозни тврдења за закани и притисоци врз неа и нејзиното семејство. Таа тврди дека ѝ се заканувале секојдневно, дека биле испраќани лица за да ја претепаат, како и дека нејзините најблиски биле малтретирани и заплашувани.

„Се ЗАКАНУВАВТЕ секој ден, испративте луѓе да ме ПРЕТЕПААТ, целото семејство ми го малтретирате и заплашувате, ама тоа не може да ги смени фактите дека сте КРИМИНАЛЦИ, поткрепено со официјални докази на 3200 страни“, напиша Арсовска.

Засега, станува збор за обвинувања изнесени од поранешната градоначалничка на социјалните мрежи. Нивната основаност, како и евентуалната кривична одговорност на посочените лица, треба да бидат утврдени од надлежните институции.

Наместо одговори за сериозните обвинувања, јавноста засега добива информација за тужба за клевета. Клучното прашање останува дали Обвинителството ќе ги испита наводите за спорните легализации и документацијата за која Арсовска тврди дека ја поседува.

CATEGORIES
TAGS
Share This