МОСКВА СО ОСТРА ПРЕДУПРЕДУВАЊЕ Напад врз Белорусија ќе значи напад и врз Русија
Рускиот заменик-министер за надворешни работи Михаил Галузин порача дека безбедноста на двете земји е неделива и дека секој надворешен напад врз едната страна ќе биде предизвик за целата Сојузна држава.
Москва ќе го смета секој надворешен напад или провокација насочена кон Белорусија за закана кон целата Сојузна држава Русија и Белорусија, изјави заменик-министерот за надворешни работи на Русија, Михаил Галузин.
Во интервју за ТАСС, Галузин потсети дека од март 2025 година е во сила Договорот за безбедносни гаранции меѓу двете земји, кој предвидува заеднички одговор на дејствија што претставуваат закана за суверенитетот, територијалниот интегритет или уставниот поредок на Русија или Белорусија.
Според него, безбедноста на двете земји е „неделива“, па секој надворешен напад врз една од нив ќе се смета за предизвик кон целата Сојузна држава.
Галузин обвини дека Киев се обидува да го прошири конфликтот и да ја вовлече Белорусија во воените дејствија. Тој тврди дека Москва ги зема предвид овие ризици, посочувајќи на, како што рече, заканите упатени кон Белорусија од украински претставници во јуни.
Рускиот дипломат оцени дека ваквите потези, како и поддршката од европските земји за Киев, според Москва, покажуваат дека украинското раководство не е заинтересирано за воспоставување мир и настојува да ја прошири зоната на конфликтот кон соседните земји.
