МИЛИЈАРДИ ОЧИ ВПЕРЕНИ КОН МЕКСИКО Започнува најголемиот фудбалски настан на планетата

По нешто помалку од четири години од Мундијалот во Катар, вечерва започнува 23. Светско првенство во фудбал,  турнир што веќе влезе во историјата поради повеќе причини и кој во следниот месец ќе биде во центарот на вниманието на спортската јавност ширум светот.

Првиот натпревар е закажан за 21 часот на легендарниот стадион „Ацтека“ во Мексико Сити, каде што домаќинот Мексико ќе се соочи со Јужна Африка. Пред почетокот на мечот ќе биде организирана и спектакуларна церемонија на отворање со настап на бројни светски музички ѕвезди.

„Ацтека“ дополнително ќе ја потврди својата уникатност, станувајќи првиот стадион во историјата на кој трипати се одржало свеченото отворање и првиот натпревар на едно Светско првенство. Претходно тоа се случи во 1970 година, во ерата на Пеле, и во 1986 година, кога светската сцена му припаѓаше на Диего Марадона.

Дуелот меѓу Мексико и Јужна Африка ќе биде и реприза на отворачкиот натпревар од Светското првенство во 2010 година, кога двете селекции ремизираа со резултат 1:1. Мексиканците ќе атакуваат на победа и први три бода пред својата публика, но и африканската репрезентација има свои амбиции на стартот од шампионатот.

Во рамките на групата А, вториот натпревар ќе се игра во Гвадалахара од 4 часот по полноќ, каде што ќе се сретнат Јужна Кореја и Чешка.

Време е за почеток на уште една светска фудбалска приказна и за месец исполнет со возбудувања, емоции и врвен фудбал.

ГРУПА А – ДЕНЕШНА ПРОГРАМА

Мексико Сити (21:00 часот) Мексико – Јужна Африка

Гвадалахара (04:00 часот) Јужна Кореја – Чешка